მთავრობის ადმინისტრაციის ინფორმაციით, საქართველოს პრემიერმინისტრი ვიქტორ ორბანს დღეს შეხვდა.

რატომ არის მნიშვნელოვანი: კონფერენცია დევიზით — "ერთად ჩვენ ძლიერები ვართ" — ძირითადად ამერიკელი და ევროპელი კონსერვატორების მონაწილეობით იმართება, რადგან, როგორც AP წერს, ევროპაში იზოლირებული უნგრეთის პოპულისტური მთავრობა მოკავშირეებს და თანამოაზრეებს ეძებს.

  • საქართველოს პრემიერმინისტრი დღეს, 5 მაისს უნგრეთის დედაქალაქში მიმდინარე კონსერვატორთა კონფერენციის ერთ-ერთი სპიკერი იყო.
  • ღარიბაშვილმა ტრიბუნა მეტწილად ჰომოფობიური გზავნილების გასაჟღერებლად გამოიყენა და ვიქტორ ორბანის ქებაც დაიმსახურა.

დეტალები: მთავრობის ცნობით, პრემიერმინისტრების შეხვედრაზე საუბარი შეეხო ორ ქვეყანას შორის არსებულ ურთიერთობებსა და სამომავლო თანამშრომლობის პერსპექტივებს როგორც ორმხრივ, ისე მრავალმხრივ ფორმატებში.

  • ლიდერებმა კიდევ ერთხელ მიმოიხილეს კონსერვატიული პოლიტიკური მოქმედების ყოველწლიური კონფერენციის (CPAC) ჩატარების მნიშვნელობა.
  • საუბარში კი ხაზი გაესვა კონფერენციაზე გაჟღერებულ გზავნილებს, რაც, საქართველოს მთავრობის ვარაუდით, მრავალი ქვეყნისთვის საერთო ღირებულებას წარმოადგენს.
  • ღარიბაშვილის თქმით, საქართველო უნგრეთთან ეკონომიკური თანამშრომლობის შემდგომ გაძლიერებას და არსებული პოტენციალის სრულად რეალიზებას აპირებს.
  • როგორც სამთავრობო ადმინისტრაცია გვამცნობს, ლიდერებმა შეხვედრაზე საქართველოს ევროკავშირში ინტეგრაციის საკითხი და ამ გზაზე უნგრეთის მხარდამჭერი განცხადების მნიშვნელობაც განიხილეს.