ამის შესახებ საპარლამენტო ოპოზიციის ნაწილმა ბრიფინგზე ისაუბრა.

რატომ არის მნიშვნელოვანი: აშშ-ის სახელმწიფო დეპარტამენტმა ქართველი მოსამართლეები, ე.წ კლანის წევრები, ლევან მურუსიძე, მიხეილ ჩინჩალაძე, ირაკლი შენგელია და ვალერიან ცერცვაძე დაასანქცირა.

• განცხადებაში აღნიშნულია, რომ მოსამართლეები "მნიშვნელოვან კორუფციულ საქმიანობაში ჩართულობის გამო" სანქცირდებიან.
• სახელმწიფო დეპარტამენტის განცხადებით, მათ ბოროტად გამოიყენეს თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა.

დეტალები: ოპოზიციონერი დეპუტატების განცხადებით, საგამოძიებო კომისიის მიზანი იმ კორუფციული ფაქტების შესწავლა იქნება, რაც აშშ-ს სახელმწიფო დეპარტამენტის განცხადებაშია აღნიშნული.

• "ჩვენ გვსურს საქართველოს პარლამენტში უახლოეს მომავალში კენჭისყრაზე დადგეს ინიციირებული საგამოძიებო კომისიის საკითხი და შეიქმნას კომისია. ამ მიზნით ორშაბათს საქართველოს პრეზიდენტს მივმართავთ რიგგარეშე სხდომის მოწვევის მიზნით, რადგან მიგვაჩნია, რომ ნებისმიერი დღე, რაც დააყოვნებს რეაგირებას სანქცირების თემებთან დაკავშირებით, შეიძლება ძალიან დიდი ზიანის მომტანი იყოს საქართველოსთვის", — თქვა თამარ კორძაიამ ბრიფინგზე.

აშშ-ის ელჩის, კელი დეგნანის განცხადებით, ამ პირებმა უგულებელყვეს სასამართლო და საჯარო პროცესი მოსამართლეების მიმართ უკანონო სარგებლის შეთავაზებით ან ზეწოლით, რათა მიეღოთ პოლიტიკური მოკავშირეების სასარგებლო გადაწყვეტილებები.

• მისივე თქმით, საქართველოს ყველა მოქალაქე იმსახურებს მართლმსაჯულებას, სამართლის უზენაესობასა და უფლებას სამართლიან და დამოუკიდებელ სასამართლოზე, ქონებრივი მდგომარეობის, ოჯახური თუ პოლიტიკური კავშირების მიუხედავად.

რას ამბობენ მოსამართლეები: ლევან მურუსიძემ თქვა, რომ "ძალიან მშვიდად და წყნარად" უყურებს გადაწყვეტილებას.

• "არც ანგარიშები არა მაქვს მე არსად, პატიოსანი ცხოვრებით მიცხოვრია, კანონი მე არ დამირღვევია და თუ ახლა ამერიკის შეერთებულ შტატებში ან ევროკავშირში არ შეგვიშვებენ, ეგრე ბაბუაჩემსაც არ უვლია და უცხოვრია კაცურად და ადამიანურად და გადაუტანია", — ამბობს მურუსიძე.
• ვალერიან ცერცვაძე კი აღნიშნავს, რომ 6 წელია რაც აღარ არის არც სასამართლო და არცერთ სხვა სახელმწიფო თანამდებობაზე.
• "შესაბამისად ჩემი, როგორც უვადო მოსამართლედ მოხსენიება აშკარად წარმოადგენს ფაქტების შეგნებულ დამახინჯებას. აღნიშნული პირდაპირ მიუთითებს იმაზე, რომ აბსოლუტურად მცდარი და დაუსაბუთებელი ინფორმაციის საფუძველზე იქნა მიღებული ეს გადაწყვეტილება", — დაწერა ცერცვაძემ.

რას ამბობენ მმართველ გუნდში: კობახიძის მტკიცებით, არსებობს პოლიტიკური ინტერესი, რომ მოხდეს დამოუკიდებელ სასამართლოში ჩარევა

• კობახიძე ამბობს, რომ აშშ-ის სახელმწიფო მდივანი, ენტონი ბლინკენი "გასვარეს".
• დეპუტატ დიმიტრი სამხარაძისთვის მოსამართლეების დასანქცირება "საქართველოს მძიმე შეურაცხყოფაა".
• მმართველი პარტიის რიტორიკა გაიმეორა ქართული ოცნებიდან ფორმალურად წასულმა გურამ მაჭარაშვილმა და თქვა: "მეტი როგორ თქვას აშშ-მ რომ უნდათ, კონტროლი დაამყარონ ქართულ მართლმსაჯულებაზე".

ოპოზიცია პრეზიდენტს მიმართავს, რიგგარეშე სხდომა მოიწვიოს, რათა საგამოძიებო კომისია შექმნან