ფინეთის საგარეო საქმეთა მინისტრმა, პეკა ჰაავისტომ ხელი მოაწერა ნატოში გაწევრიანების დოკუმენტს, რომელიც აშშ-ს სახელმწიფო მდივანს, ანტონი ბლინკენს გადასცა ბრიუსელში გამართულ ცერემონიაზე.

რატომ არის მნიშვნელოვანი: რუსეთის უკრაინაში შეჭრის ფონზე, ფინეთმა და შვედეთმა ნატოს წევრობაზე განაცხადი გასული წლის მაისში გააკეთეს, რითაც უარი თქვეს მრავალწლიან სამხედრო ნეიტრალიტეტზე.

  • ფინეთის ნატოში გაწევრიანების შედეგად, სამხედრო ალიანსის საზღვარი რუსეთის ფედერაციასთან თითქმის გაორმაგდა.
  • პასუხად, რუსეთის საგარეო საქმეთა სამინისტრომ განაცხადა, რომ "რუსეთის ფედერაცია იძულებული იქნება მიიღოს სამხედრო-ტექნიკური და სხვა საპასუხო ზომები, რათა დაუპირისპირდეს ფინეთის ნატოში გაწევრიანების შედეგად ეროვნული უსაფრთხოებისთვის წარმოქმნილ საფრთხეებს".

დეტალები: ფინეთის ნატოში გაწევრიანება ნიშნავს, რომ ქვეყანა ექვემდებარება ალიანსის მე-5 მუხლს — კოლექტიური თავდაცვის დაპირებას, რომელიც ითვალისწინებს, რომ თავდასხმა ნატოს ერთ წევრზე ჩაითვლება თავდასხმად ყველა მათგანზე.

  • ასევე, ფინეთი სამხედრო ალიანსისთვისაც დიდი მონაპოვარია, 280 000 კაციანი არმიით და ევროპის ერთ-ერთი უდიდესი საარტილერიო არსენალით.