რუსი გამომძიებლების მტკიცებით, სწორედ დარია ტრეპოვამ გადასცა ტატარსკის ქანდაკება, რომელიც მოგვიანებით აფეთქდა.

რატომ არის მნიშვნელოვანი: ტატარსკი იყო უკრაინაში ომის მხარდამჭერი, ცნობილი ბლოგერი, რომელსაც ნახევარ მილიონზე მეტი გამომწერი და პრიგოჟინის მსგავსად, კრიმინალური წარსული ჰქონდა.

  • რუსეთის ანტიტერორისტულმა კომიტეტმა განაცხადა, რომ თავდასხმა ორგანიზებული იყო უკრაინის სპეცსამსახურების მიერ ოპოზიციის ლიდერ, ალექსეი ნავალნისთან "თანამშრომლობით".
  • დადგინდა, რომ ადგილი, სადაც რუსი სამხედრო ბლოგერი ააფეთქეს, ვაგნერის დაჯგუფების მეთაურს, პრიგოჟინს ეკუთვნოდა.

დეტალები: რუსული მედიის ცნობით, 26 წლის ტრეპოვამ ტატარსკის ქანდაკება გადასცა, რომელიც, სავარაუდოდ, ასაფეთქებელს შეიცავდა.

  • ეჭვმიტანილის შესახებ ცნობილი გახდა, რომ იგი სანქტ-პეტერბურგიდანაა, მეორადი ტანსაცმლის მაღაზიაში მუშაობდა და წარსულში დაკავებული იყო ანტი საომარ დემონსტრაციაში მონაწილეობის გამო.
  • რუსეთის შინაგან საქმეთა სამინისტრომ გაავრცელა ვიდეო ჩანაწერი, სადაც ტრეპოვა, სავარაუდოდ იძულების ქვეშ, სანქტ-პეტერბურგის კაფეში ბლოგერისთვის ქანდაკების გადაცემის ფაქტს ადასტურებს.
  • თუმცა გავრცელებულ კადრებში ის არ აღიარებს, რომ აფეთქების შესახებ წინასწარ იცოდა, და აცხადებს, რომ მოგვიანებით უპასუხებს კითხვას, თუ თავად მას ვინ გადასცა "საჩუქარი".
  • კაფეში, სადაც ტატარსკი თანამოაზრეებს ხვდებოდა, აფეთქების შედეგად 30-ზე მეტი ადამიანი დაიჭრა.