ექსპრეზიდენტი კლინიკა ვივამედში სახალხო დამცველის კონსილიუმმა დღეს მოინახულა.

რატომ არის მნიშვნელოვანი: 28 მარტს სააკაშვილი სოციალურ ქსელში წერდა, რომ მისი ჯანმრთელობის მდგომარეობა ისევ გაუარესდა და მოითხოვდა, კონსილიუმი მასთან მისულიყო და მოენახულებინა.

  • ამისთვის მან სახალხო დამცველს, ლევან იოსელიანს მიმართა, ხელი შეეწყო ამ პროცესისთვის.
  • სახალხო დამცველმა, ლევან იოსელიანმა უპასუხა, რომ კონსილიუმი საჭიროების არსებობის შემთხვევაში, თავად იღებს გადაწყვეტილებას მსჯავრდებულის მონახულების თაობაზე და ამ პროცესში სახალხო დამცველი არ ერევა გარდა იმ ფორმალური ნაწილისა, რაც მსჯავრდებულის მოსანახულებლად საჭირო რწმუნებების გაცემასა და ხელმოწერასთან არის დაკავშირებული.

დეტალები: ნევროლოგი თენგიზ წულაძე ამბობს, რომ კიდევ უფრო მეტად გამოიხატა კახექსიის მდგომარეობა და სისუსტე.

  • "ფაქტი მხვდება, რომ ვერ ჭამდა და გახდა. ვერ ჭამდა თუ არ ჭამდა, მე ამას ხომ არ ვაკვირდები. ჩემთვის, როგორც ერთი ვიზიტის განმახორციელებელი ადამიანისთვის თვეში ერთხელ ან თუნდაც სამ თვეში ერთხელ, მე ამაზე ვერანაირ პასუხს ვერ გავცემ", — ამბობს წულაძე.
  • მისივე თქმით, სააკაშვილის მდგომარეობა მძიმეა და მას სჭირდება სერიოზული ჩარევები, რომ მისი სიცოცხლე გადარჩეს იმიტომ, რომ ასეთ მდგომარეობაში რთულია თქვა როდის დამძიმდება პაციენტი.
  • რეანიმატოლოგი გიორგი გრიგოლიას თქმით, თუ უნდათ, რომ მიხეილ სააკაშვილის ჯანმრთელობა შენარჩუნდეს და დაიცვან, უმჯობესი იქნება რომ პოლიტიკური გადაწყვეტილება იქნეს მიღებული.
  • "მე არ მინდა ვილაპარაკო გადავადება იქნება თუ დროებით რაღაცა. მე მგონია, რომ საქართველოს პირობებში, სადაც არ ეხსნება ის სტრესი, თავს გრძნობს პატიმრად და არ ეხსნება სტრესი, ნებისმიერ კლინიკაში ექნება იგივე რეზულტატი", — თქვა გრიგოლიამ.
  • ამბობს, რომ მკურნალობის შედეგად დღეს მიხეილ სააკაშვილის მდგომარეობა არის იმაზე უარესი, ვიდრე იყო ვივამედში გადმოსვლამდე.