საქართველოს პარლამენტის წევრი ქართული ოცნებიდან, ენძელა მაჭავარიანი დაინტერესდა როდის დაემატება საზოგადოებრივ მაუწყებელს GDS-ის ყოფილი თანამშრომლები. ეს კითხვა მაჭავარიანმა საზოგადოებრივი მაუწყებლის სამეურვეო საბჭოს თავმჯდომარეს, გრიგოლ გოგელიას დაუსვა.

"მაინტერესებს აი იმ დანარჩენ ხალხთან როდის დაამთავრებთ მოლაპარაკებებს და კიდევ უფრო როდის გააძლიერებთ GDS-ის ხალხით თქვენს საინფორმაციო გადაცემებს," - იკითხა დეპუტატმა.

გრიგოლ გოგელიას თქმით, არხზე თანამშრომლების აყვანის პროცესში სამეურვეო საბჭო ჩართული არაა.

მას შემდეგ, რაც საზოგადოებრივი მაუწყებლის გენერალური დირექტორი GDS-ის ყოფილი თანამშრომელი, ვასილ მაღლაფერიძე გახდა, არხზე თავის 20-მდე ყოფილი თანამშრომელი დაასაქმა. მაღლაფერიძისა და საზოგადოებრივ მაუწყებელზე დასაქმებული თანამშრომლების GDS-ში მუშაობის დროს არხი საქართველოს ყოფილი პრემიერ-მინისტრისა და მმართველი პარტიის - ქართული ოცნების დამფუძნებლის ბიძინა ივანიშვილის ოჯახს ეკუთვნოდა. ამავე არხზე გადაცემა 20/30-ის პროდიუსერი იყო ენძელა მაჭავარიანიც.