პოსტი, რომლითაც ნინო წილოსანი რამიშვილის მხილებას გამოეხმაურა, ქართული ოცნების პოლიტიკის ქებით იწყება და ისე სრულდება, რომ რამიშვილი ნახსენები არ არის.

რატომ არის მნიშვნელოვანი: ხელისუფლებასთან აფილირებული ტელეკომპანიის ხელმძღვანელს, რომელიც აქამდეც ამხილეს სექსუალურ შევიწროებაში, კიდევ 3 ქალი ღიად ადანაშაულებს.

• გუშინ, 20 მარტს ჟურნალისტმა მაკო ჯაბუამ Facebook გვერდზე დაწერა, რომ რამიშვილმა, დაახლოებით, 7-8 წლის წინ, სამსახურებრივი გასაუბრების დროს შეავიწროვა, სექსუალური ხასიათის კითხვები დაუსვა და პორნო ჩართო.
• მაკო ჯაბუას პოსტს გამოეხმაურა ბათუმის დრამატული თეატრის მსახიობი, ანანო იაშვილი, რომელმაც დაწერა, რომ წლების წინ რამიშვილისგან სექსუალური შევიწროების მსხვერპლი თავადაც გახდა.
• ასევე, გვანცა ბუდაღაშვილი ერთ-ერთია იმ ქალებს შორის, რომლებიც რამიშვილის მხრიდან შევიწროებაზე საუბრობენ.

დეტალები: წილოსანი ამბობს, რომ დანაშაული მძიმეა, თუმცა აქვე მიანიშნებს, რომ ეს დადასტურებული არ არის.

• "ყველანი უნდა ვათვითცნობიერებდეთ, რომ ამგვარი დანაშაული ძალიან მძიმეა, ხოლო ერთი ხელის მოსმით დასკვნების კეთება ან დაბრალება, არანაკლებ მძიმე", — წერს ის.
• ქართული ოცნების დეპუტატი ცდილობს, რამიშვილი "მორალის პოლიციისგან" დაიცვას.
• "რა თქმა უნდა, ყველა მოძალადე უნდა დაისაჯოს, მაგრამ კანონით და არა "მორალის პოლიციის" ხელით, რომელსაც ხშირ შემთხვევაში მანიპულაციურად და ბოროტად იყენებენ".

რამიშვილი ირიბად დაიცვა მამუკა მდინარაძემაც და განაცხადა, რომ მაკო ჯაბუასი არ სჯერა.

• "ჩემთვის არ არის დამაჯერებელი, რომ 7 წელი ადამიანი რაღაცას არ აცხადებდა და ახლა გაახსენდა ფაშისტური კამპანიის ფონზე. ასეთი დამთხვევების მე არ მჯერა. შეიძლება, რაღაც ხდებოდეს, მაგრამ ასეთი დამთხვევების, ასეთი შემთხვევითობების მე არ მჯერა. მგონია, ჩემი აზრი ეს არის და თქვენ ნუ მაიძულებთ, სხვა აზრზე გადავიდე", — თქვა მან.

სექსუალური შევიწროება არის არასასურველი სექსუალური ხასიათის ქცევა, რომელიც მიზნად ისახავს ან იწვევს ღირსების შელახვას და ქმნის დამაშინებელ, მტრულ, დამამცირებელ ან შეურაცხმყოფელ გარემოს.

• კანონის მიხედვით, სექსუალური ხასიათის ქცევად მიიჩნევა სექსუალური ხასიათის ფრაზების თქმა ან/და მიმართვა, გენიტალიების ჩვენება ან/და სექსუალური ხასიათის სხვა ნებისმიერი არასიტყვიერი ფიზიკური ქცევა.

• იმ შემთხვევაში, თუ მიიჩნევთ, რომ სექსუალურად შეგავიწროვეს სამსახურში, უნდა მიმართოთ სასამართლოს ან სახალხო დამცველს, ხოლო თუ ეს მოხდა საჯარო სივრცეში — პოლიციას.

• სექსუალური შევიწროება ადმინისტრაციულ სამართალდარღვევათა კოდექსით ისჯება და არ არის სისხლის სამართლის დანაშაული.

• საზოგადოებრივ ადგილებში პირის მიმართ არასასურველი სექსუალური ხასიათის ქცევა ჯარიმდება 300 ლარით, ხოლო ადმინისტრაციული სახდელის დადებიდან 1 წლის განმავლობაში განმეორების შემთხვევაში — 500 ლარით, შესაძლებელია გამასწორებელი სამუშაოებიც ერთ თვემდე ვადით.

• იგივე ქმედება არასრულწლოვანის, ორსულის, უმწეო მდგომარეობაში მყოფის, შეზღუდული შესაძლებლობების მქონე პირის მიმართ ან არასრულწლოვანის თანდასწრებით — გამოიწვევს დაჯარიმებას 500-დან 800 ლარამდე ოდენობით.

• ერთი წლის განმავლობაში გამეორების შემთხვევაში გამოიწვევს 800-დან 1 000 ლარამდე ოდენობით ჯარიმას, ან გამასწორებელ სამუშაოებს ერთ თვემდე ვადით, ან ადმინისტრაციულ პატიმრობას 10 დღემდე ვადით.