შესაბამისი განცხადება პერსონალურ მონაცემთა დაცვის სამსახურმა გაავრცელა.

რატომ არის მნიშვნელოვანი: პერსონალურ მონაცემთა დაცვის სამსახური 2022 წლის 14 დეკემბერსა და მიმდინარე წლის 15 თებერვალს ექსპრეზიდენტის კადრების გასაჯაროების კანონიერებას სწავლობდა.

  • პენიტენციური სამსახური ამტკიცებდა, რომ კლინიკა ვივამედში სააკაშვილის ყოფნის ამსახველი ვიდეომასალის გავრცელების მიზანი საზოგადოების ობიექტური ინფორმირება იყო.
  • კადრები უხმოდ და უკონტექსტოდ იყო შეკრული. 10-წუთიანი ვიდეოდან ყოფილი პრეზიდენტის მაშინდელ მდგომარეობას ყველაზე ცოტა, 19 წამი ეთმობოდა, პოსტის აღწერაში კი სახელმწიფო უწყება წერდა: "აღნიშნულ ვიდეომასალაში ნათლად ჩანს მიხეილ სააკაშვილის სიმულაციური ქმედებები, რომლის მიზანია მართლმსაჯულების განხორციელებისთვის ხელის შეშლა".
  • ვიდეომასალის გასაჯაროებას წინ უძღოდა იუსტიციის მინისტრის, რატი ბრეგაძის მუქარა, რომ, თუ სიმულაციური ქმედებები არ შეწყდებოდა, კადრებს გაასაჯაროებდნენ.

დეტალები: პერსონალურ მონაცემთა დაცვის სამსახური ამბობს, რომ ვიდეოჩანაწერები მაღალი საჯარო ინტერესის გამო გასაჯაროვდა, თუმცა, მათივე თქმით, პენიტენციურმა ვერ დაიცვა პერსონალურ მონაცემთა დამუშავების პრინციპების პროპორციულობა.

  • სამსახური სამართალდამრღვევად ცნეს სააკაშვილის კვების კადრების გასაჯაროებაზე, ვიდეოთვალთვალზე ექსპრეზიდენტის წესების დარღვევით ინფორმირებასა და ჩანაწერების ვადის განსაზღვრის გარეშე შენახვაზე;
  • ასევე — გამაფრთხილებელი ნიშნების განთავსებისა და სამედიცინო პერსონალის წერილობითი ინფორმირების გარეშე ვიდეოთვალთვალის გამო.
  • კანონდარღვევის გამო პენიტენციური სამსახური 500 ლარით დაჯარიმდა.