ამის შესახებ ზურაბ ჭიაბერაშვილმა ფორმულას ეთერში გუშინ, 26 ნოემბერს ისაუბრა.

რატომ არის მნიშვნელოვანი: ერთიანი ნაციონალური მოძრაობის ნაწილი შიდაპარტიულ არჩევნებს და თავმჯდომარის თავიდან არჩევას ითხოვს.

  • ამ დროისთვის ცნობილია, რომ თავმჯდომარის არჩევნებში მონაწილეობას მიიღებენ, მოქმედი თავმჯდომარე ნიკა მელია, დეპუტატი ლევან ხაბეიშვილ და გიორგი მუმლაძე.

დეტალები: წამყვანმა ჭიაბერაშვილს ჰკითხა, რომ მედიაში გავრცელდა ინფორმაციის, რომ შესაძლოა, ჭიაბერაშვილმა პარტიის არჩევნებში კენჭი იყაროს, რაზეც მან უპასუხა, რომ ამაზე უფიქრია და ახლაც ფიქრობს.

  • მისი თქმით, ზოგჯერ ის კონკურენცია, რასაც ახლა ვხედავთ, არცთუ სასურველ სახეს იღებს.

  • "ნაციონალური მოძრაობა უნდა იყოს ერთგვარი ქოლგა პარტია, თუ დიდი პლატფორმა, რომელშიც თავი უნდა იპოვოს საზოგადოების ძალიან ბევრმა ჯგუფმა";

  • "მე პირდაპირ მინდა ვთქვა, რომ ჩვენ არ უნდა დავუკაროთ არც ნიკას მელიას, არც ლევან ხაბეიშვილს, არც გიორგი მუმლაძეს ის ღირსებები, რაც მათ გაუკეთებიათ... მაგრამ მიმაჩნია, რომ კიდევ უფრო მეტი რამ არის საჭირო ამ პარტიისთვის, რათა ის იყოს იმ ტიპის პლატფორმა, რომელიც შეკრავს ფართო საზოგადოებრივ კონსენსუსს", — ამბობს ჭიაბერაშვილი.

გამოხმაურებები: ენმ-ს წევრმა, რომან გოცირიძემ დაწერა: "ისტორია მეორდება ორჯერ, პირველად როგორც ტრაგედია და მეორედ როგორც ფარსი".

  • "ეს ლოზუნგი მოუხდებოდა ნაციონალურ მოძრაობაში მიმდინარე პროცესებს. მთელი სერიოზულობით რომ ვიგრძნოთ მომენტის ტრაგიკომიკურობა, შემოვდივარ წინადადებით, პარტიის თავმჯდომარის პოსტზე კენჭი იყაროს განდგომილმა სოზარ სუბარმა, ისიც ხომ ერთ დროს ნაციონალი იყო?!" — თქვა გოცირიძემ.
  • "სადაც ჭიაბერაშვილს ენმ თავმჯდომარეობა უნდა, ბარემ ჩემი მხარდაჭერა ფრიდონ ინჯიას. ისეთი უტიფრობის მწვერვალია, ცინიზმი თუ გადაგვარჩენს", — აცხადებს ენმ-ის კიდევ ერთი წევრი ანა წითლიძე.

ზურაბ ჭიაბერაშვილმა 2017 წელს სხვა ლიდერებთან ერთად, ერთიანი ნაციონალური მოძრაობა დატოვა და ევროპული საქართველოს შეუერთდა.

  • 2021 წელს კი ბლოგი გამოაქვეყნა, სადაც წერდა, რომ ევროპულ საქართველოსთან ერთად, პოლიტიკიდანაც მიდიოდა.
  • " აუცილებლობად მიმაჩნია, გვერდზე გაწევით (და არა უკანდახევით), გზა დავუთმოთ მომავალ თაობას. ჩემს გარშემო უამრავ ახალგაზრდას ვხედავ, რომელსაც მე ვანდობდი მნიშვნელოვანი საზოგადოებრივი საქმეების მოგვარებას", — წერდა ჭიაბერაშვილი.