საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე ხაშურსა და თერჯოლაში მომხდარ დანაშაულებს გამოეხმაურა.

რა მოხდა: ხაშურის მუნიციპალიტეტის სოფელ ცხრამუხაში, სურამისა და ხაშურის ეპარქიის დედათა მონასტერში ორი პირი შეიჭრა.

  • თავდამსხმელები ფიზიკურად გაუსწორდნენ მონასტრის წინამძღვარს და მონაზვნებს, ერთ-ერთი მონაზონი მრავლობითი დაზიანებებით საავადმყოფოშია გადაყვანილი.
  • გამოძიება დაიწყო სისხლის სამართლის კოდექსის 179-ე და 137-ე მუხლებით, რაც ყაჩაღობას და გაუპატიურებას გულისხმობს.

  • 24 ნოემბერს, თერჯოლაში, ერთ-ერთ სუპერმარკეტში,კაცმა ყოფილი ცოლი მოკლა.

რატომ არის მნიშვნელოვანი: ჯაღმაიძე მომხდარ ფაქტებს "მასმედიის მიერ წარმოებულ ანტიეკლესიურ პროპაგანდას" უკავშირებს.

  • მისი განმარტებით, კონკრეტულ მედიასაშუალებებს მიაჩნიათ, რომ "ქვეყნის ხსნა მართლმადიდებლური ეკლესიის სრული რეორგანიზაციაში ან საერთოდ დაშლაშია".
  • დეკანოზი თერჯოლაში ფემიციდის შემთხვევას ოჯახურ ტრაგედიად მოიხსენიებს და მიზეზად აქაც ქრისტიანული ეკლესიის "დაკნინების მცდელობებს" და ასევე "ოჯახური ტრადიციების ნგრევას" ასახელებს.

ჯაღმაიძეს არგუმენტად მოჰყავს ნინოწმინდის პანსიონში განვითარებული მოვლენები, როგორც ეკლესიის დისკრედიტაციის მცდელობა.

  • სახალხო დამცველმა ნინოწმინდის პანსიონთან დაკავშირებით სპეციალური ანგარიში გამოაქვეყნა. დოკუმენტში ვკითხულობთ, რომ არასრულწლოვანთა მიმართ წლების მანძილზე ხორციელდებოდა დამამცირებელი, არაადამიანური და წამებასთან გათანაბრებული მოპყრობა.
  • დეკანოზი მედია კრიტიკას ეკლესიის დევნის ერთ-ერთ უმკაცრეს ეტაპად განიხილავს და პარალელს ავლებს რომის იმპერიასთან. "დიოკლეტიანეს დევნაც მოტივირებული იყო სწორედ იმ მოსაზრებით, რომ ქრისტიანები იყვნენ მთავარი ხელისშემშლელი ფაქტორი რომის იმპერიის ეკონომიური თუ პოლიტიკური გამარჯვებებისა", — აცხადებს იგი.

ქალთა მიმართ ძალადობა: საქართველოს გენერალური პროკურატურის მონაცემებით, 2021 წელს გენდერული დისკრიმინაციის მოტივი ქალთა მიმართ და ოჯახში ძალადობის სისხლის სამართლის საქმეებში 732 დანაშაულში გამოიკვეთა.

  • ეს მაჩვენებელი განსაკუთრებით მაღალია და 2016-2020 წლების ჯამური მონაცემთან შედარებით 157%-ით არის გაზრდილი.
  • ამგვარ დანაშაულებში ბრალდებულთა 99% კაცია ხოლო გენდერული ძალადობის 84% ოჯახური დანაშაულის სახისაა.