ალიევის თქმით, არ სურს სომხეთთან სამშვიდობო მოლაპარაკებებში საფრანგეთმა მიიღოს მონაწილეობა. შეხვედრა 7 დეკემბერს ბრიუსელში საფრანგეთის პრეზიდენტთან, ემანუელ მაკრონთან და ევროპული საბჭოს ხელმძღვანელთან, შარლ მიშელთან 7 დეკემბერს იყო დაგეგმილი.

რატომ არის მნიშვნელოვანი: 2020 წლის 10 ნოემბერს, ომის შემდეგ, სომხეთმა, აზერბაიჯანმა და რუსეთმა სამშვიდობო შეთანხმებას მოაწერეს ხელი, რომლის მიხედვითაც სომხეთს აზერბაიჯანისთვის ტერიტორიების გადაცემა მოუწია, ხოლო ლაჩინში შეიქმნა დერეფანი, სადაც რუსი სამშვიდობოები განლაგდნენ.

  • ამის შემდეგ ცეცხლის შეწყვეტის შეთანხმება არაერთხელ დაირღვა — სხვადასხვა მონაცემით, მეორე ომის დასრულების შემდეგ, სომხეთ-აზერბაიჯანსა და მთიან ყარაბაღში რუსი სამშვიდობოების ჩათვლით, რამდენიმე ასეული ადამიანი დაიღუპა;
  • მეზობელი ქვეყნების ურთიერთბრალდებებს სისტემური სახე აქვს, განსაკუთრებით სექტემბრის შემდეგ, როცა კონფლიქტი ისევ განახლდა.

დეტალები: სექტემბრის ბოლოსა და გასულ თვეს პრაღაში მხარეები ცეცხლის შეწყვეტასა და საზღვარზე ევროკავშირის სამოქალაქო მისიის ამოქმედებაზე შეთანხმდნენ.

  • დღეს, 25 ნოემბერს ალიევმა სომხეთის პრემიერმინისტრი, ნიკოლ ფაშინიანი საფრანგეთის შუამავლის როლის მოთხოვნის გამო, მოლაპარაკებების შემდეგი ეტაპის ჩაშლის მცდელობაში დაადანაშაულა.
  • ალიევის მტკიცებით, მაკრონი ბაქოს თავს დაესხა, შეურაცხყოფა მიაყენა და ანტიაზერბაიჯანული პოზიცია დაიჭირა.
  • "ნათელია, რომ ამ პირობებში, ამ დამოკიდებულებით, საფრანგეთი ვერ იქნება აზერბაიჯანსა და სომხეთს შორის სამშვიდობო პროცესის ნაწილი".

სომხეთის საგარეო საქმეთა სამინისტროს განცხადებით, სურთ, მაკრონისა და მიშელის მონაწილეობით დისკუსიების "პრაღის ფორმატი" შეინარჩუნონ.

  • პრესსპიკერის თქმით, აზერბაიჯანის მტკიცებას, რომ სომხეთი სამშვიდობო მოლაპარაკებების ჩაშლას ცდილობს, რეალობასთან კავშირი არ აქვს.
  • აღსანიშნია, რომ მაკრონმა რუსეთი ბაქოსა და ერევანს შორის დაძაბულობის გაღვივებაში დაადანაშაულა და ფაშინიანთან სატელეფონო საუბრისას სომხეთი სუვერენიტეტის მხარდაჭერა დაადასტურა.