საქართველოს გენერალური პროკურატურის ცნობით, ცოტნე გამსახურდიას მკვლელობის მცდელობისა და დანაშაულის შეუტყობინებლობისთვის, მსჯავრდებულების მიმართ გამოტანილი გამამტყუნებელი განაჩენი თბილისის სააპელაციო სასამართლომ ძალაში დატოვა.

რატომ არის მნიშვნელოვანი: საქართველოს პირველი პრეზიდენტის, ზვიად გამსახურდიას შვილი ცოტნე გამსახურდია 2019 წლის 19 დეკემბერს დაჭრეს.

  • პროკურატურის თქმით, გამსახურდიას ფიზიკურად გაუსწორდნენ, დანით და ხელჯოხით სიცოცხლისთვის სახიფათო მძიმე ხარისხის დაზიანებები მიაყენეს.
  • შემთხვევის შედეგად, მას გულმკერდის არესა და თავის ტვინზე ორი ოპერაცია ჩაუტარდა.
  • გამოძიება მკვლელობის მცდელობისა და დანაშაულის შეუტყობინებლობის ბრალდებით მიმდინარეობდა.

დეტალები: თბილისის საქალაქო სასამართლომ ორი პირი დამნაშავედ ცნო ჯგუფურად ცოტნე გამსახურდიას მკვლელობის მცდელობაში და სასჯელის სახედ 15-15 წლით თავისუფლების აღკვეთა განუსაზღვრა.

  • დანაშაულის ჩადენის შემსწრე ორი პირი დამნაშავედ ცნეს განსაკუთრებით მძიმე დანაშაულის შეუტყობინებლობისთვის და სასჯელის სახედ ოთხი და ხუთი წლით თავისუფლების აღკვეთა მიესაჯათ.
  • განაჩენი დაცვის მხარემ სააპელაციო სასამართლოში გაასაჩივრა, თუმცა სასამართლომ მოთხოვნა არ დააკმაყოფილა.