7,5-წუთიანი სატელეფონო საუბრის ვიდეო რუსმა პრანკერებმა ვოვანმა და ლექსუსმა Youtube-ზე განათავსეს, ხოლო ავთენტურობა დუდას ოფისმა Twitter-ზე დაადასტურა.

რატომ არის მნიშვნელოვანი: დუდას ოფისმა დაწერა, რომ პოლონეთის საზღვართან სარაკეტო აფეთქების შემდეგ სახელმწიფოსა და მთავრობის მეთაურებთან მიმდინარე ზარების დროს დაკავშირება მოახერხა პირმა, რომელიც ამტკიცებდა, რომ საფრანგეთის პრეზიდენტი, ემანუელ მაკრონია.

  • როგორც განცხადებაშია ნათქვამი, პოლონეთის პრეზიდენტი მიხვდა, რომ ეს, შესაძლოა, ხუმრობა ყოფილიყო და საუბარი შეწყვიტა.

  • დიალოგი სწორედ რაკეტის ჩამოვარდნას შეეხებოდა. პრანკერები დუდას ეკითხებიან, ადანაშაულებენ თუ არა ჯო ბაიდენი და ვოლოდიმირ ზელენსკი რაკეტების ჩამოვარდნაში რუსეთს.

დეტალები: პრანკერები მაკრონის სახელით ამბობენ ფრაზას: "ჩვენ არ გვჭირდება ესკალაცია რუსეთსა და NATO-ს შორის".

  • რაზეც დუდა პასუხობს: "ემანუელ, შენ ფიქრობ, რომ მე მინდა რუსეთთან ომი? დამიჯერე, მე არ მინდა ომი და დამიჯერე, მე მეტისმეტად ფრთხილი ვარ. მე ვსაუბრობ მხოლოდ NATO-ს მე-4 მუხლზე, მე არ ვსაუბრობ მე-5 მუხლზე".
  • ისინი, ასევე, ინტერესდებიან, თუ რას იზამს დუდა, თუ კი აღმოჩნდება, რომ ეს რუსული რაკეტები იყო.
  • "ჩვენ ვისაუბრებთ ჩვენს მოკავშირეებთან, თქვენთან, ამერიკელებთან, პრეზიდენტ ბაიდენთან და ვფიქრობ, რომ უნდა ვიპოვოთ გამოსავალი ამ რთული სიტუაციიდან".
  • მათგანვე ისმის კითხვა, თუ რას ფიქრობს დუდა ე.წ. ბინძურ ბომბზე, რაზეც პოლონეთის პრეზიდენტის პასუხი ასეთია:
  • "მე უფრო მეტად ვარ შეშინებული უკრაინაში ატომურ ელექტროსადგურთან დაკავშირებული პრობლემებით, ვიდრე რაღაც ბინძური ბომბით".

პირველი შემთხვევა არაა, როდესაც რუსი პრანკერები სხვადასხვა პოლიტიკურ პირს და არა მარტო, სხვისი სახელით უკავშირდებიან.

  • წარსულში მოტყუებით ესაუბრნენ ემანუელ მაკრონს, ელტონ ჯონს, ბორის ჯონსონსა და სხვებს.
  • 2020 წელს კი მათ პოლონეთის პრეზიდენტს გაეროს გენერალური მდივნის, ანტონიო გუტიერეშის სახელით დაურეკეს.