საქართველოს პატრიარქმა ილია მეორემ რუსეთის პატრიარქ კირილს დაბადების დღე მიულოცა და რუსეთ-უკრაინას შორის "სამართლიანობისა და მშვიდობის" აღდგენა უსურვა.

რატომ არის მნიშვნელოვანი: პატრიარქი კირილი პუტინთან დაახლოებული პირი და მისი პოლიტიკის გამტარებელია. ის მხარს უჭერს რუსეთის ომს უკრაინაში.

  • კირილმა არაერთხელ აკურთხა რუსი სამხედროები, რომლებიც უკრაინაში იბრძვიან.
  • ომის დაწყების შემდეგ, 3 აპრილს კირილმა შეიარაღებული ძალებისთვის აშენებულ საკათედრო ტაძარში იქადაგა და თქვა, რომ ხალხმა უნდა გაიღვიძოს და გაიგოს, რომ დადგა "განსაკუთრებული დრო, რომელზეც შეიძლება დამოკიდებული იყოს ხალხის ისტორიული ბედი"

დეტალები: ნიკოლოზ ფაჩუაშვილის თქმით, რუსეთისა და საქართველოს ეკლესიებს შორის ევქარისტიული კავშირია, რომლის გაწყვეტასაც სერიოზული არგუმენტი სჭირდება.

  • "ჩვენ ეს ყველაფერი გავლილი გვაქვს, რაც უკრაინაში დღეს ხდება, საქართველომ ეს გაიარა, ჯერ კიდევ 90-იან წლებში და მერე 2008 წლის ომში. ეს არ არის საკმარისი საფუძველი, იმისთვის, რომ პატრიარქმა პატრიარქთან ურთიერთობა გაწყვიტოს, არასწორია რა", — თქვა მან.

გარდა ამისა, მეუფე ნიკოლოზი ფიქრობს, რომ კირილი სრულიად რუსეთის პატრიარქია და მის ტერიტორიაზე მიმდინარეობს ეს ომი.

  • "კანონიკური ტერიტორიაა რუსეთის ეკლესიის. პასუხს აგებს პატრიარქი ამ ყველაფერზე", — ამბობს ის.

უკრაინის მართლმადიდებელ ეკლესიას ავტოკეფალია 2019 წლის 6 იანვარს მიენიჭა.

  • მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს, მიტროპოლიტ ეპიფანს ტომოსი გადასცა, რითაც ახალი ეკლესიის შექმნა ფორმალურად დასრულდა.
  • ამის შემდეგ რუსულმა ეკლესიამ ბართლომესთან ურთიერთობა გაწყვიტა. უკრაინის სამრევლოების ნაწილმა უარყო გადაწყვეტილება და დარჩა მოსკოვის იურისდიქციის ქვეშ.

ნიკოლოზ ფაჩუაშვილი რამდენიმე დღის წინ მოსკოვში იმყოფებოდა, სადაც საპატრიარქოს საგარეო საეკლესიო ურთიერთობის განყოფილების თავმჯდომარეს, მიტროპოლიტ ანტონს შეხვდა.

  • ფაჩუაშვილის თქმით, მოსკოვში იმყოფება კონფერენციაზე, რომელიც მის ბაბუას, დავით არსენიშვილს ეძღვნება.