23-25 ნოემბერს ბრიუსელში, ბელგიაში, ჟურნალისტიკის ევროპული სიმპოზიუმი იმართება. ღონისძიება 25 ქვეყნის ასამდე სპიკერს აერთიანებს: ჟურნალისტები და მედიამენეჯერები ერთმანეთს გამოცდილებასა და ექსპერტიზას გაუზიარებენ.

საქართველოდან სიმპოზიუმზე On.ge-ა წარმოდგენილი. სპიკერებს შორის არის დოდი ხარხელი, On.ge-ის სტრატეგიული მრჩეველი.

"ევროპულ არენაზე ქართული მედიის რეპრეზენტაცია უმნიშვნელოვანესი საკითხია. თავისუფალი, პლურალისტული მედიაგარემო საქართველოსთვისაც და მთელი მსოფლიოსთვისაც პრიორიტეტულია, განსაკუთრებით დეზინფორმაციისა და ყალბი ამბების ერაში. მედიასაშუალებებს მთელ მსოფლიოში, და განსაკუთრებით ევროპაში, დღესდღეობით მსგავსი გამოწვევები აქვთ. ამ გამოწვევების დაძლევა მედიასაშუალებებს შორის მჭიდრო პარტნიორობით ბევრად უფრო რეალისტურია," — დოდი ხარხელი.

ჟურნალისტიკის ევროპული სიმპოზიუმი პირველად ტარდება. გეგმაშია წელიწადში ორი შეხვედრა, სადაც პროფესიონალები შეძლებენ განიხილონ გამოწვევები და განვითარების ხელისშემშლელი ფაქტორები საზოგადოებასთან, მკვლევრებთან, პოლიტიკურ და ეკონომიკურ ექსპერტებთან და სამოქალაქო საზოგადოების წარმომადგენლებთან ერთად.

"მაშინ, როცა ომი უკრაინაში ევროპას სისხლით სვრის და ართმევს თავისუფალ, ობიექტურ ინფორმაციასთან წვდომის უფლებას, განსაკუთრებით მნიშვნელოვანია შეიქმნას სივრცე, სადაც შესაძლებელი იქნება დიალოგი და თავისუფალი, პლურალისტური ინფორმაციის სისტემების როლის განმტკიცება, მშვიდობისა და დემოკრატიის მხარდასაჭერად," — აცხადებენ ორგანიზატორები.

სიმპოზიუმზე მედიისთვის მნიშვნელოვანი თემები იქნება განხილული: პროპაგანდა და ყალბი ამბები, ჟურნალისტიკის გამოწვევები, მედიაცნობიერება, კიბერშეტევები და მედიის თავისუფლება. 24 ნოემბერს "რეპორტიორები საზღვრების გარეშე" უკრაინელ და ბელგიელ ჟურნალისტებთან ერთად სპეციალურ საღამოს აწყობს უკრაინის ომის გაშუქების შესახებ.

ღონისძიების თანაორგანიზატორია IHECS (სოციალური კომუნიკაციების გაღრმავებული კვლევების ინსტიტუტი - ბრიუსელის ჟურნალისტიკის სკოლა) და საფრანგეთის ჟურნალისტიკის ასოციაცია. პარტნიორი ქვეყნებიდან ჟურნალისტებისა და მედიამენეჯერების ჩართვა სიმპოზიუმში კი EU NEIGHBOURS east-ის მხარდაჭერით მოხდა (ევროკავშირის თანამშრომლობა აღმოსავლეთ პარტნიორებთან).