რამდენიმე თვის წინ ფილმებისა და სერიალების ცნობილი ქართული მეკობრული ვებგვერდები adjaranet და iMovies გაითიშა. 21 ნოემბრის საღამოს მომხმარებლების ნაწილმა adjaranet-ზე შესვლა მოახერხა, თუმცა დანარჩენებისთვის საიტი კვლავ გათიშულია.

adjaranet-ის ჩართვის შესახებ სოციალურ ქსელებში — ფეისბუქსა და ტიკტოკზე მომხმარებლები ფოტოებსა და ვიდეოებს აქვეყნებენ, თუმცა თავად adjaranet-ის ტიკტოკზე ვებგვერდის ჩართვის შესახებ ვიდეო არ გამოქვეყნებულა. აღსანიშნავია, რომ adjaranet-ის ანგარიში ფეისბუქზე ჯერჯერობით ისევ არ არსებობს.

@giorgi.tsereteli

თქვენი საახალწლო სურვილი რა იყო? 🥳

♬ original sound - .

აგვისტოში adjaranet-ისა და iMovies-ის გათიშვას წინ უძღოდა პირველი ქართული ლეგალური ონლაინ კინოთეატრის — CaveaPlus-ის ამუშავება, თუმცა თავად კავეას წარმომადგენელმა adjaranet-ისა და iMovies-ის გათიშვასთან პირდაპირი კავშირი, როგორც ეს ბევრმა მაყურებელმა დაინახა, უარყო.

24 აგვისტოს კომუნიკაციების კომისიამ გაავრცელა განცხადება, რომელშიც აღნიშნულია, რომ ფილმებისა და სერიალების არალეგალურ ქართულ ვებგვერდებს "თითქმის ორწლიანი ვადა მისცა იმისთვის, რომ საკუთარ პლატფორმებზე განთავსებული კონტენტი კანონთან შესაბამისობაში მოეყვანათ და ლეგალურად განეთავსებინათ". მიცემული ვადის ამოწურვის შემდეგ კი კომუნიკაციების ეროვნულმა კომისიამ პროვაიდერებს ამ საიტების დაბლოკვა მოსთხოვა.

ჯერ კიდევ 2019 წელს გავლენიანი ამერიკული კინოსტუდიების საერთო დისტრიბუტორმა კომპანია Motion Picture Association of America-მ საქართველოს ინტელექტუალური საკუთრების ეროვნულ ცენტრს გამაფრთხილებელი წერილით ინტერნეტსივრცეში ფილმების განთავსების კანონიერად დარეგულირება მოსთხოვა. 2021 წლის ნოემბერში ჰოლივუდის დიდი კინოსტუდიების ამავე გაერთიანების მიმართვის საფუძველზე ინსტაგრამსა და ფეისბუქზე ქართული მეკობრული ვებგვერდების სოციალური მედიის ანგარიშები წაიშალა. 2022 წლის მაისში კი ცნობილი გახდა, რომ ევროკავშირის წევრობის კითხვარში მნიშვნელოვანი ადგილი ეჭირა სწორედ ინტელექტუალური საკუთრების დაცვის ვალდებულებას, რისი სამომავლოდ კიდევ უფრო ქმედითად აღსრულება საქართველომ თავის თავზე აიღო.