ოფიციალური პირები რუსების სარდლობის განცხადებებს ხერსონის დატოვების შესახებ არაერთგვაროვნად აფასებენ, "დადგმულ შოუს' და რუსეთის მორიგ პროვოკაციას უწოდებენ.

რატომ არის მნიშვნელოვანი: ხერსონი პირველი ქალაქია, რომელიც ოკუპანტებმა დაიკავეს უკრაინაში სრულმასშტაბიანი შეჭრის შემდეგ.

• რუსეთმა ხერსონის ანექსია გამოაცხადა და რეგიონს საკუთარ ტერიტორიად მიიჩნევს, —ამიტომ რუსეთის თავდაცვის დღევანდელი განცხადება "საკუთარი" ქალაქის დათმობას ნიშნავს.

შეფასებები: "ნაადრევია ვისაუბროთ ხერსონის განთავისუფლებაზე", — განაცხადა TV Rain-ის ეთერში ოპერატიული სარდლობის სამხრეთის სპიკერმა, ნატალია გუმენიუკმა.

• გუმენიუკი ხერსონიდან ჯარების გაყვანის შესახებ განცხადებას რუსეთის ხელმძღვანელობის მიერ "სახის გადარჩენის" და უკრაინის ჯარის დემონიზაციის მცდელობას უწოდებს.
• მისი თქმით, რეალური სამხედრო ოპერაცია მოითხოვს ინფორმაციული დუმილის რეჟიმს, რუსეთის სარდლობის განცხადება, შესაძლოა იყოს "ინფორმაციულ-ფსიქოლოგიური ოპერაციის ელემენტი".
• გუმენიუკის ინფორმაციით, ხერსონის მახლობლად შექმნილია თავდაცვის ხაზები და რეგულარული რუსული ჯარები ადგილზე არიან.
• "თუ რუსები რამეს ამბობენ, საწინააღმდეგოს აკეთებენ", — ასე გამოეხმაურა ნიკოლაევის სამხედრო ადმინისტრაციის ხელმძღვანელი ვიტალი კიმი რუსების განცხადებას.
• პრეზიდენტის ადმინისტრაციის უფროსი სავარაუდოდ ამ ფაქტს ასე ეხმაურება, — "ზოგი ფიქრობს, რომ ძალიან ეშმაკია, მაგრამ ჩვენ ერთი ნაბიჯით წინ ვართ".

გარდა ამისა, ალექსეი არესტოვიჩი რუსების ხერსონიდან გასვლას ასე გამოეხმაურა:

• "რუსეთის ჯარი არ ტოვებს ხერსონს, რუსეთის ჯარი ხერსონიდან უკრაინის თავდაცვის ჯარებმა გააძევეს".
• "ნაადრევად ნუ ჩავარდებით ეიფორიაში: რასაც არ უნდა ამბობდნენ რუსები, ენდეთ მხოლოდ ინფორმაციის ოფიციალურ წყაროებს", განაცხადა ხერსონის ადმინისტრაციის ხელმძღვანელმა, იაროსლავ იანუშევიჩმა.
• "უკრაინა ვერ ხედავს ნიშნებს, რომ რუსები უბრძოლველად ტოვებს ხერსონს. ქალაქში რჩება რუსული ჯგუფების მნიშვნელოვანი ნაწილი. უკრაინა ტერიტორიებს ათავისუფლებს დაზვერვის მონაცემების და არა დადგმული სატელევიზიო განცხადებების საფუძველზე" — ასე გამოეხმაურა უკრაინის პრეზიდენტის ადმინისტრაციის უფროსის მრჩეველი ხერსონიდან რუსების გასვლაზე განცხადებას.

სტრიქონებს შორის: 9 ნოემბერს რუსეთის საგარეო საქმეთა სამინისტრომ განაცხადა, რომ რუსეთი მზადაა უკრაინასთან მოლაპარაკებებისთვის "იმ რეალობის გათვალისწინებით, რომელიც ამ მომენტში ვითარდება".

• უკრაინის საგარეო საქმეთა სამინისტროს სპიკერის, ოლეგ ნიკოლენკოს განცხადებით, რუსეთის სავარაუდო მზაობას მოლაპარაკებებისთვის უკრაინა განიხილავს, როგორც დროის მოგების და სიტუაციის თავის სასარგებლოდ შეცვლის მცდელობებს.
• "რუსი ოფიციალური პირები იწყებენ მოლაპარაკებების გახსენებას ყოველ ჯერზე, როცა რუსული ჯარები მარცხდებიან ბრძოლის ველზე. მოსკოვი არ არის დაინტერესებული უკრაინაში მშვიდობის აღდგენით".
• "დიალოგისთვის მზადყოფნის სიმულაციური გზით, რუსეთის ფედერაცია ცდილობს დრო მოიგოს დანაყოფების გადაჯგუფებისთვის, მოამზადოს ახლახან მობილიზებული რუსები, მოაგვაროს იარაღის ნაკლებობის საკითხი, აღმოფხვრას ლოჯისტიკის ხარვეზები და შემდეგ განახლებული ენერგიით წამოიწყოს აგრესიის ახალი ტალღები. ეს უკვე გავიარეთ 2014-2015 წლებში." — განმარტავს ნიკოლენკო.

ნატოს გენერალური მდივნის განცხადებით, ხერსონის გარშემო განვითარებულ მოვლენებზე დასკვნის გაკეთება მოგვიანებით იქნება შესაძლებელი.

• თუმცა მანვე გაიხსენა, რომ უკრაინამ არაერთხელ აიძულა რუსული ჯარები დაეტოვებინათ ოკუპირებული ტერიტორიები.
• "შთამაგონებელია იმის დანახვა, რომ მამაც უკრაინელ სამხედროებს შეუძლიათ უფრო და უფრო მეტი ტერიტორიის გათავისუფლება", — განაცხადა სტოლტენბერგმა.