თანაგუნდელების ბრიფინგს ენმ-ის თავმჯდომარემ ბრიფინგითვე უპასუხა.

რატომ არის მნიშვნელოვანი: უკვე რამდენიმე თვეა ვრცელდება ინფორმაციები ენმ-ში არსებულ შიდაპარტიულ დაპირისპირებაზე, რასაც ოფიციალურად არ ადასტურებდნენ.

  • დღეს პარტიის წევრთა ნაწილმა ყველა დონეზე შიდა პარტიული არჩევნები მოითხოვა.
  • მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.

დეტალები: ნიკა მელია ამბობს, რომ მისი კოლეგების ბრიფინგიდან ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.

  • აცხადებს იმასაც, რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.
  • მისივე თქმით, ამ კონსულტაციების ფარგლებში, პარტიის შიგნით არჩევნების საკითხი დააყენა თვენახევრის წინ, რასაც ესწრებოდნენ ის თანაგუნდელებიც, ვინც დღეს ბრიფინგი გამართა.
  • "არჩევნების საკითხზე იყო თანხმობა, მსჯელობის საგანი იყო მხოლოდ, როდის და როგორ ჩატარდებოდა არჩევნები. თუ რაიმე არის ჩემთვის კომფორტული — არის არჩევნები, ღია საჯარო და მხარდამჭერთა აბსოლუტური უმრავლესობის ჩართულობით", — განაცხადა მელიამ.
  • და დაამატა, რომ მზად არის და იქნება, მონაწილეობა მიიღოს ნებისმიერი ტიპის არჩევნებში, მითუმეტეს მაშინ, როცა "არც თუ ისე ცოტა სათქმელი დაუგროვდა".

მელიამ განაცხადა, რომ დეტალების თაობაზე, თუ როგორ და რა ფორმით უნდა ჩატარდეს არჩევნები პარტია იმსჯელებს.

  • "მათ შორის იმ ადამიანების თანამონაწილეობით, რა თქმა უნდა, ვინც დღეს ჩემი ღრმა რწმენით, გააკეთეს ძალიან ნაჩქარევი განცხადება, რომელსაც როგორც ჩანს, შორსმიმავალი გეგემები აქვს", — თქვა ენმ-ის თავმჯდომარემ.
  • მისივე განცხადებით, რაც შეიძლება სრაფად, არჩევნები ორგანიზებული უნდა იყოს ნაციონალური მოძრაობის "მრავალი ათასი და ათიათასობით ამომრჩევლით" და იმედს იტოვებს, რომ უახლოეს მომავალში გამოუჩნდება კონკურენტი.
  • პარტიის თავმჯდომარე ამბობს, რომ ოპონენტთან ისაუბრებენ მხოლოდ სიმართლეზე და ენმ-ის ამომრჩეველს მიეცემა გააზრებული არჩევანის გაკეთების შესაძლებლობა, "რომელიც ხელს შეუწყობს პარტიის განვითარებას და აქედან გამომდინარე ქვეყნის განვითარებას".