პროკურატურა აცხადებს, რომ 7 ქვეყნის ჩართულობით, ერთდროულად 4 ქვეყნის ტერიტორიაზე ტრანსნაციონალური დანაშაული გამოავლინეს — გამოძიებაში გერმანიის 60 და საქართველოს სამართალდამცავი ორგანოების 300-მდე თანამშრომელი მონაწილეობდა.

რატომ არის მნიშვნელოვანი: უწყების ინფორმაციით, განხორციელდა 5 ე.წ. ქოლცენტრის, ათეულობით ფიზიკური პირის, საცხოვრებელი ბინების, ავტომანქანების და სამუშაო ადგილების ჩხრეკა და ამოღებულია ასეულობით ინფორმაციის ელექტორნული მატარებელი, დოკუმენტაცია და დიდი ოდენობით ფულადი თანხა.

  • ამავდროულად ყადაღა დაედო სავარაუდოდ დანაშაულებრივი გზით მოპოვებულ ქონებებს და საბანკო ანგარიშებზე განთავსებულ თანხებს.
  • მათივე თქმით, პირველ ეტაპზე სისხლისსამართლებრივი დევნა სხვადასხვა ქვეყანაში დაწყებულია დანაშაულის ორგანიზატორთა გარკვეული ნაწილის მიმართ, საქართველოში კი დაკავებულია დანაშაულებრივი ჯგუფის ერთ-ერთი ორგანიზატორი.

დეტალები: გამოძიების ინფორმაციით, ტრანსნაციონალური ორგანიზებული დანაშაულებრივი ჯგუფის საქმიანობა მოიცავს კომპანიების დაფუძნებას და მათ ბაზაზე ე.წ. ქოლცენტრების მოწყობას.

  • უწყენის განმარტებით, ქოლცენტრების მეშვეობით ხდება ევროკავშირის წევრი ქვეყნების, მათ შორის, გერმანიის მოქალაქეების კუთვნილი მილიონობით ევროს თაღლითურად დაუფლება და შემდგომში გათეთრება.
  • მათივე თქმით, დანაშაულებრივი ჯგუფის წევრების მიერ ე.წ. ქოლცენტრის ფუნქციონირებისათვის, სხვადასხვა საფირმო სახელწოდებით ქმნიდნენ ელექტრონულ სავაჭრო პლატფორმებს, რომლებიც უზრუნველყოფდა მომხმარებლისაგან თაღლითურად მოპოვებული თანხების განთავსებას ფიქტიური საწარმოების საბანკო ანგარიშებზე.
  • პროკურატურის ინფორმაციით, ანალოგიურ დანაშაულებზე, გერმანელ კოლეგებთან თანამშრომლობის შედეგად, სისხლისსამართლებრივი დევნა დაწყებულია ე.წ. ქოლცენტრების საქმიანობაში ჩართული 36 ფიზიკური და 2 იურიდიული პირის მიმართ.