ირმა მანაგაძის თქმით, სასამართლომ კულტურის სამინისტროს კომპენსაციისა და განაცდურის ანაზღაურება დააკისრა.

რატომ არის მნიშვნელოვანი: ეს პირველი შემთხვევა არაა, როდესაც სასამართლომ თეა წულუკიანის მიერ თანამშრომლის გათავისუფლება უკანონოდ მიიჩნია.

  • მას შემდეგ, რაც კულტურის მინისტრის პოზიციაზე თეა წულუკიანი დაინიშნა, არაერთი აქცია გაიმართა, სადაც აცხადებდნენ, რომ კულტურის სფეროდან თანამშრომლებს იდეოლოგიური მიუღებლობის გამო ათავისუფლებდნენ.

დეტალები: მანაგაძე აქვე მიუთითებს, რომ საქალაქო სასამართლომ არ დააკმაყოფილა მისი სამსახურში აღდგენის მოთხოვნა.

  • "მაგრამ არა უშავს, დრონი მეფობენ და არა მეფენი. ადრე თუ გვიან მე აუცილებლად დავბრუნდები მუზეუმში", — წერს ის.

იქამდე ეროვნულმა მუზეუმმა გაავრცელა ინფორმაცია, რომ სასამართლომ მანაგაძის მოთხოვნა კომპენსაციის სახით 10 560 ლარის გადახდასა და სამსახურში აღდგენაზე არ დააკმაყოფილა.

  • პოსტი საკუთარ ვებგვერდზე კულტურის სამინისტრომ გადააზიარა — მანაგაძე კი ამ ინფორმაციას სიცრუეს უწოდებს.
  • იმავეს წერს იურიდიულ კომპანია Jastice League-ის იურისტი, დიტო ხვიჩია, რომელიც გათავისუფლებული თანამშრომლის ინტერესებს სასამართლოში იცავდა.
  • ხვიჩია მიუთითებს, რომ მანაგაძის სარჩელის დიდი ნაწილი დაკმაყოფილდა, გათავისუფლების ბრძანება უკანონოდ ცნეს და მუზეუმს, როგორც კომპენსაციის, ასევე, განაცდურის გადახდა დაეკისრა.

არქივიდან: მანაგაძემ 21 იანვარს სოციალურ ქსელში დაწერა, რომ შალვა ამირანაშვილის სახელობის ხელოვნების სახელმწიფო მუზეუმიდან გაათავისუფლეს.

  • აცხადებდა, რომ კომპეტენციის დადგენისა და შერჩევის მიზნით შექმნილმა კომისიამ, რომელთანაც 5 წუთიანი ზოგადი გასაუბრება ჰქონდა, დაადგინა რომ ხელოვნების მუზეუმის თანამშრომლობას არ "იმსახურებდა".
  • ამბობდა, რომ არასდროს არცერთი დირექტორის "გუნდში" არ ყოფილა.
  • "რაც მისწავლია და მიშრომია… ყველაფერი ორმა იურისტმა ერთ წუთში გადამიწყვიტა!" — წერდა ის.