ევროპარლამენტის საგარეო კომიტეტზე საქართველოსთან ევროკავშირის ასოცირების შეთანხმების წლიური განხორციელების ანგარიში განიხილეს.

რატომ არის მნიშვნელოვანი: თავდაპირველად, შესწორების დოკუმენტი გუშინ, 8 ნოემბერს გავრცელდა.

• განსახილველ რეზოლუციაში ჩანაწერები ბიძინა ივანიშვილს, მიხეილ სააკაშვილს, ნიკა გვარამიას, მედიის თავისუფლებასა და ჟურნალისტების უსაფრთხოებასაც შეეხებოდა.
• დეპუტატებს ჯამში, 220-მდე ცვლილების ინიციატივა ჰქონდათ წარდგენილი.
• დღეს კი კომიტეტზე 47-მა ევროპარლამენტარმა მხარი დაუჭირა კომპრომისულ ცვლილებებს, 5 წინააღმდეგი იყო, ხოლო 2-მა თავი შეიკავა.

ბიძინა ივანიშვილი: მის შესახებ #69 შესწორებაშია საუბარი და მისი ავტორები ანა ფოტიგა და იაცეკ სარიუშ-ვოლსკი და ასიტა კანკო არიან, რომლებიც ევროპელი კონსერვატორებისა და რეფორმატორების ჯგუფს (ECR Group) წარმოადგენენ.

• ცვლილებებით ითხოვდნენ, ევროკავშირის ინსტიტუტებმა შეისწავლონ ივანიშვილის რუსეთთან კავშირები და რუსეთის მიერ სანქციების გვერდის ასავლელად საქართველოს გამოყენების მცდელობები.
• "დადასტურების შემთხვევაში, ევროპარლამენტი მოუწოდებს, მასა და მის ახლო მოკავშირეებს პირადი სანქციები დაუწესდეთ".
• ივანიშვილი ნახსენებია #107 შესწორებაშიც, რომლის მიხედვითაც, ევროკავშირი იძლევა რეკომენდაციას, აღმოიფხვრას ივანიშვილის გადაჭარბებული გავლენა საქართველოს პოლიტიკურ, ეკონომიკურ და საზოგადოებრივ ცხოვრებაზე.
• "საქართველოსთვის ამის გადაწყვეტა აუცილებელია კანდიდატის სტატუსის მინიჭებამდე".

სააკაშვილი და გვარამია: 71-ე შესწორებით ევროპარლამენტარი იაცეკ სარიუშ-ვოლსკი კანდიდატის სტატუსის მინიჭების ერთ-ერთ წინაპირობად ჰუმანიტარული მიზნით სააკაშვილის გათავისუფლებას და საზღვარგარეთ სამკურნალოდ გადაყვანას ითხოვდა.

• 114-ე შესწორების ავტორი, სვენ მიქსერი საქართველოს ხელისუფლებას მოუწოდებდა, სააკაშვილს დართოს საზღვარგარეთ სამედიცინო დახმარების მიღების ნება, როგორც ჰუმანიტარული მკურნალობისთვის, ასევე, პოლიტიკური პოლარიზაციის შემცირებისთვის.
• ერთ-ერთ შესწორებაში, რომელთა ავტორებიც მარიამ ლექსმანი, ვლადიმერ ბილჩიკი, მაიკლ გალერი, რასა იუკნევიჩიენე და ანდრიუს კუბილიუსი არიან, დაგმობილია გვარამიას მიმართ გამოტანილი განაჩენი.
• ასევე, არის მოწოდება განაჩენის გადახედვის შესახებაც.

გარდა ამისა, ხაზგასმულია, რომ კრიტიკული მედიის ხელმძღვანელები საქართველოში ხშირად ხდებიან ზეწოლის ობიექტები.

• ამ კონტექსტში დოკუმენტში ნახსენებია ფორმულას დამფუძნებელი, დავით კეზერაშვილი და TV პირველის დამფუძნებელი, ვატო წერეთელი.
• რეზოლუციის დრაფტის მიხედვით, საქართველოს ხელისუფლებას მოუწოდებდნენ, უზრუნველყოს ჟურნალისტების თავისუფლება და უსაფრთხოება.

ქართული ოცნების თავმჯდომარის, ირაკლი კობახიძის თქმით, "ოდიოზური ევროპარლამენტარები აბსოლუტურად არარელევანტური და სიმართლეს აცდენილის ცვლილებების" შეტანას ცდილობენ რეზოლუციაში.

• "ევროპარლამენტი მოსამართლეა თუ პროკურორი თუ რა არის", — ასე კი რეზოლუციაში შესატან ცვლილებებს დეპუტატი ბეჟან წაქაძე გამოეხმაურა.