განცხადების ხელმომწერები როგორც მედიები, ასევე, არასამთავრობო ორგანიზაციები არიან.

რატომ არის მნიშვნელოვანი: ხელისუფლებისადმი კრიტიკულად განწყობილი მთავარი არხის დამფუძნებელი, ნიკა გვარამია დღეს, 2 ნოემბერს სააპელაციო სასამართლომ 3 წლითა და 6 თვით პატიმრობაში დატოვა.

• გვარამია დამნაშავედ ცნეს უფლებამოსილების ბოროტად გამოყენებაში — ე.წ. რეკლამის გაყიდვისა და ავტომანქანის საქმეებზე.
• NGO-ების განცხადებით, გვარამიას საქმე პოლიტიკურად მოტივირებულია. ომბუდსმენი კი უკიდურეს შეშფოთებას გამოხატავს.
• აშშ-ის საელჩომ სააპელაციოს გადაწყვეტილება უკვე შეაფასა და თქვა, რომ გვარამიას პატიმრობა რისკის ქვეშ აყენებს ქართველი ხალხის მკაფიო არჩევანს.

დეტალები: განცხადებაში აღნიშნულია, რომ გვარამიას საქმე პოლიტიკურად მოტივირებულია, ხოლო მის მიმართ წარდგენილი ბრალდებები — უსაფუძვლო, რასაც სახალხო დამცველისა და არასამთავრობო ორგანიზაციების სასამართლოში წარდგენილი მოსაზრებებიც მიუთითებდა.

• "ვფიქრობთ, რომ ნიკა გვარამია დღეს პატიმარია მხოლოდ იმიტომ, რომ ის არის ხელისუფლების ხმამაღალი კრიტიკოსი და აქვს დიდი გავლენა საზოგადოებრივი აზრის ფორმირებაზე".
• "მის მიერ შექმნილი ტელეკომპანია მთავარი არხი კი სხვა ტელეკომპანიებთან ერთად, ხელისუფლების მხრიდან თავდასხმისა და შევიწროვების მუდმივი ობიექტია".

ხელმომწერების შეფასებით, გვარამიას პატიმრობა უდიდესი დაბრკოლებაა საქართველოს ევროინტეგრაციის გზაზე.

• ხაზგასმულია, რომ საქართველოში მედიის თავისუფლებისა და ჟურნალისტების უსაფრთხოების შესახებ ევროპარლამენტარების რეზოლუციაც ცალსახად გმობს მისი დპატიმრების ფაქტს.
• სასამართლო სისტემაში არსებული მძიმე გამოწვევებისა და კრიტიკუკლი მედიის მიმართ ქართული ოცნების აგრესიული პოლიტიკის გათვალისწინებით, არ არსებობს მოლოდინი, რომ გვარამიას უფლებები უზენაეს სასამართლოში დაცული იქნება.
• "ერთადერთ გზად მისი უსამართლო პატიმრობის აღსაკვეთად პრეზიდენტის მიერ ნიკა გვარამიას შეწყალება გვესახება. საქართველოს პრეზიდენტს უკვე არაერთმა საზოგადოებრივმა თუ პოლიტიკურმა ჯგუფმა მიმართა ამ თხოვნით".

განცხადებაში ნათქვამია, რომ შარლ მიშელის, როგორც საქართველოს დემოკრატიული განვითრების ერთგული მხარდაჭერის მიმართვამ, შესაძლოა, სალომე ზურაბიშვილს ჰუმანური და ქვეყნისთვის მნიშვნელოვანი ნაბიჯი გადაადგმევინოს და გვარამიას შეიწყალოს.

• "ბატონო მიშელ, თქვენი შუამდგომლობა სერიოზულ წვლილს შეიტანს საქართველოში სიტყვის თავისუფლების დაცვაში და ძალას შემატებს ქართველი ხალხის მისწრაფებას ევროპისაკენ".

ხელს აწერს საქართველოს ჟურნალისტური ეთიკის ქარტია, ღია საზოგადოების ფონდი, საერთაშორისო გამჭვირვალობა — საქართველო, სამართლიანი არჩევნების და დემოკრატიის საერთაშორისო საზოგადოება და სხვა.

• განცხადებას უერთდება On.ge, ასევე მთავარი არხი, ფორმულა, TV პირველი, ნეტგაზეთი, პუბლიკა და სხვები.
• ხელმომწერთა სრული სია შეგიძლიათ იხილოთ აქ.