გამოცემა მედუზა წერს, რომ პეტერბურგის პრიმორსკის რაიონულმა სასამართლომ 60 წლის ადგილობრივ მცხოვრებს, ირინა ციბანევას აღკვეთის ღონისძიება შეუცვალა.

რატომ არის მნიშვნელოვანი: ციბანევაზე სისხლის სამართლის საქმე 6 ოქტომბერს აღიძრა, სერაფიმოვსკის სასაფლაოზე რუსეთის პრეზიდენტის, ვლადიმერ პუტინის მშობლების საფლავზე დატოვებული ჩანაწერის გამო.

  • "მანიაკის მშობლებო, წაიყვანეთ ის თქვენთან, ის იმდენ ტკივილს და უბედურებას იწვევს, მთელი მსოფლიო მის სიკვდილზე ლოცულობს. სიკვდილი პუტინს, თქვენ აღზარდეთ მახინჯი და მკვლელი", — წერდა ქალი.

დეტალები: ციბანევას ბრალად ედებოდა პოლიტიკური ან იდეოლოგიური მტრობის საფუძველზე სამარხის შეურაცხყოფა, რაზეც პროკურატურა პატიმრობას ითხოვდა, თუმცა 12 ოქტომბერს სასამართლომ შინაპატიმრობა გადაწყვიტა.

  • დღეს, 7 ნოემბერს კი მოსამართლემ ქალს შინაპატიმრობაც გაუუქმა და გარკვეული ქმედებების აკრძალვით ჩაანაცვლა.
  • მას აუკრძალეს ინტერნეტით სარგებლობა და პეტერბურგის სერაფიმოვსკის სასაფლაოს მონახულება.

არქივიდან: სექტემბრის ბოლოდან ვლადიმერ პუტინის მშობლების საფლავზე გაძლიერებული დაცვაა, რადგან მაშინ ერთ-ერთმა აქტივისტმა საპროტესტო ბანერი დატოვა.

  • კერძოდ, სკოლის დღიურის ვიზუალზე გააკეთა წარწერა: "ძვირფასო მშობლებო! თქვენი შვილი ცუდად იქცევა! ისტორიის გაკვეთილების აცდენს, კლასელებთან ჩხუბობს, მთელი სკოლის აფეთქებით იმუქრება! იმოქმედეთ!"