მედიის ადვოკატირების კოალიცია ეხმაურება 2 ნოემბრის სააპელაციოს გადაწყვეტილებას, რომლითაც სასამართლომ იმპიჩმენტზე ნათია კაპანაძის სარჩელი არ დააკმაყოფილა.

რატომ არის მნიშვნელოვანი: კაპანაძე საზოგადოებრივი მაუწყებლის აჭარის ტელევიზიის მრჩეველთა საბჭოს 2019 წლის 19 აპრილის გადაწყვეტილებას ასაჩივრებდა, რომლითაც მას იმპიჩმენტი გამოუცხადეს.

• იმპიჩმენტის ინიციატივას არასამთავრობო ორგანიზაციები მკვეთრად უარყოფითად აფასებდნენ და ტელევიზიაზე სახელისუფლებო გავლენის მოპოვების მცდელობაზე საუბრობდნენ.
• კაპანაძეს მხარი დაუჭირა საქართველოს სახალხო დამცველმა — პროცესებს გამოეხმაურა აშშ-ის საელჩოც.
• ნათია კაპანაძის დირექტორობის დროს არხი პირველად მოხვდა საერთაშორისო და ადგილობრივი ორგანიზაციების ანგარიშებში, როგორც ყველაზე დაბალანსებული ტელევიზია.

კოალიციის განცხადებით, გადაწყვეტილება კიდევ ერთი ნაბიჯია უკან მედიის თავისუფლებისა და ევროინტეგრაციის გზაზე.

• ორგანიზაცია მიუთითებს, რომ სააპელაციომ ბათუმის საქალაქოს გადაწყვეტილება ძალაში დატოვა ისე, რომ განმარტებები არ გაუკეთებია და მხოლოდ იმის აღნიშვნით შემოიფარგლა, რომ სრულად ეთანხმება პირველი ინსტანციის სასამართლოს.
• "ვფიქრობთ, მსგავსი გადაწყვეტილებები საქართველოს მიერ კანდიდატის სტატუსის მოპოვების მცდელობის ფონზე, კიდევ უფრო გვაშორებს ევროპულ მომავალს".
• მათივე შეფასებით, ეს საქმე კიდევ ერთი მაგალითია, რომ ხელისუფლება ზღუდავს მედიის თავისუფლებას, ხოლო სასამართლო სისტემის დამოუკიდებლობა პრობლემურია.

დეტალები: განცხადებაში აღნიშნულია, რომ 2019 წელს აჭარის ტელევიზიაში არსებული პროგრესის ფონზე კაპანაძის უსაფუძვლო იმპიჩმენტმა ბევრი კითხვა გააჩინა.

• გარდა ამისა, ახალი მენეჯმენტის მიერ კრიტიკული ჟურნალისტების მიზანმიმართულმა დევნამ ცხადი გახადა, რომ კაპანაძის იმპიჩმენტი არხის სარედაქციო პოლიტიკის შეცვლას ისახავდა მიზნად.

არქივიდან: კაპანაძის დირექტორის თანამდებობიდან გადაყენებას ხუთი მრჩევლიდან ოთხმა დაუჭირა მხარი.

• იმპიჩმენტის პროცესი ნაციონალური მოძრაობის კვოტით წარდგენილმა, ირაკლი დარცმელიძემ და ქართული ოცნების დასახელებულმა, გიგა ჩხარტიშვილმა დაიწყეს.
• ისინი აცხადებდნენ, რომ დირექტორი მოვალეობას ვერ ასრულებდა, რაც პრიორიტეტების შეუსრულებლობასა და ტელევიზიაში ხელფასებთან დაკავშირებით არსებულ პრობლემებში გამოიხატებოდა.
• იმპიჩმენტის მოთხოვნაზე ინფორმაციის გავრცელების შემდეგ კაპანაძემ თქვა, რომ საფრთხე ექმნება სარედაქციო დამოუკიდებლობასა და მაუწყებლის გამართულ მუშაობას, ამავეს ამბობდა არხის თანამშრომლების ნაწილიც.
• 6 მაისს ბათუმის საქალაქო სასამართლომ იმპიჩმენტზე მისი სარჩელი არ დააკმაყოფილა — რაზეც კაპანაძემ განაცხადა, რომ მოსამართლემ პოლიტიკურ დღის წესრიგს არ გადაუხვია.

ნათია კაპანაძე აჭარის ტელევიზიის დირექტორად 2016 წლის 24 ოქტომბერს სამწლიანი ვადით აირჩიეს. უფლებამოსილების შესრულებას ის ამავე წლის 21 დეკემბრიდან შეუდგა.

• მისი დირექტორობის პერიოდში ეთერში რამდენიმე სხვადასხვა გადაცემა გავიდა. მათ შორის, რადიო თავისუფლების პროექტები, რომელთა გაშვებაზეც საზოგადოებრივი მაუწყებლის პირველმა არხმა უარი განაცხადა.
• 2019 წელს ეუთოს დემოკრატიული ინსტიტუტებისა და ადამიანის უფლებების ოფისმა (OSCE/ODIHR) ანგარიშში განაცხადა, რომ აჭარის ტელევიზია იყო "ერთადერთი ტელესადგური, რომელმაც შესთავაზა მაყურებელს არჩევნებში მონაწილეთა ზოგადი შედარება".
• 2018 წელს კაპანაძემ დირექტორის რანგში ტოლერანტობის ქომაგის წოდება მიიღო.