ვაკე-საბურთალოს პოლიციის უფროსის მოადგილის, კახა მურადაშვილის განცხადებით, გამოძიება უწყვეტ რეჟიმში მიმდინარეობს.

რატომ არის მნიშვნელოვანი: 13 ოქტომბერს ვაკის პარკის შადრევანში ჩასულ ბავშვებს დენმა დაარტყა. 13 წლის მოზარდი გარდაიცვალა, ხოლო 2 დაშავდა.

• ერთ-ერთი ბავშვი იაშვილის კლინიკიდან გაწერეს, მეორე კი ხელოვნური სუნთქვის აპარატიდან მოხსნეს.
• გამოძიება სისხლის სამართლის კოდექსის 240-ე პრიმა მუხლის პირველი და მეორე ნაწილით გრძელდება, რაც ელექტრო ობიექტზე უსაფრთხოების წესების დარღვევას გულისხმობს, რასაც ადამიანის სიცოცხლის მოსპობა მოჰყვა.

დეტალები: მურადაშვილის თქმით, გამოძიების დაწყებისთანავე შემთხვევის ადგილზე ჩატარდა ყველა საჭირო საგამოძიებო მოქმედებები, რომელშიც მონაწილეობდნენ როგორც შსს-ს ისე სამხარაულის ექსპერტიზის ბიუროს ექსპერტები.

• აცხადებს, რომ დაიკითხნენ სამუშაოს შემსრულებელი კომპანიის წარმომადგენლები, ასევე თბილისის საქალაქო სამსახურის წარმომადგენლები, სკოლის დირექტორი, მანდატურები, პედაგოგები და ყველა ვინც შეესწრო მომხდარს;
• "დაახლოებით 100-მდე პირია ამ ეტაპზე დაკითხული. გამოძიება სწავლობს ყველა დოკუმენტაციას, რომელიც ამოღებულ იქნა შემსრულებელი კომპანიის და თბილისის საქალაქო სამსახურიდან", — თქვა პოლიციის უფროსის მოადგილემ ჟურნალისტებთან.

რას ამბობენ მერიაში: მერის მოადგილის, ანდრია ბასილაიას განცხადებით, თანამშრომლები ყოველდღე მუშაობდნენ ჩართულ შადრევანში.

• ბასილაია ამბობს, რომ ვაკის პარკის შადრევნის რეაბილიტაცია აგვისტოში დასრულდა და მას შემდეგ სისტემური ტესტირება მუდმივად ტარდებოდა;
• როგორც ბასილაია ამბობს, მუნიციპალიტეტის, ისე კონტრაქტორი კომპანიის თანამშრომლები ყოველდღიურ რეჟიმში იყვნენ ჩართულ შადრევანში, ასევე აქტიურად აკეთებდნენ სისტემის ტესტირებას და რაიმე შემთხვევა არც ერთხელ დაფიქსირებულა.

გრინსერვის+: ვაკის პარკში კასკადისა და მრგვალი შადრევნის რეაბილიტაცია 12 ოქტომბერს დასრულდა — სარეაბილიტაციო სამუშაოებს კომპანია გრინსერვისი+ ასრულებდა.

• ლაშა ფურცხვანიძის ადვოკატის თქმით, გრინსერვის+-ის დირექტორი პასუხისმგებლობას გრძნობს, მაგრამ "დამნაშავე ვარო, არ უთქვამს".

არქივიდან: გრინსერვისი+-ის მფლობელის, ლაშა ფურცხვანიძის წინააღმდეგ 2013 წელს სამეწარმეო საქმიანობაში უკანონო მონაწილეობის და უკანონო შემოსავლის ლეგალიზაციის საქმეზე გამოძიება მიმდინარეობდა.

• 2018 წელს TI აღნიშნავდა, რომ მიუხედავად ამისა, ეს კომპანია 2013 წლის იანვრიდან მონაწილეობს სახელმწიფო შესყიდვებში და 2018 წლის პირველ ნოემბრამდე 21 მლნ ლარის ღირებულების ელექტრონული ტენდერები მოიგო, ასევე, გამარტივებული შესყიდვით 95 000 ლარი მიიღო.
• 2021 წელს ფლანგვის დეტექტორი წერდა, რომ მხოლოდ 2020 წელს კომპანიამ 5 ტენდერში უკონკურენტოდ გაიმარჯვა და 7 წელში ტენდერების გზით დაახლოებით 41 256 287 ლარი აქვს მიღებული.

ოფიციალურად წარდგენილ დოკუმენტაციაში ვაკის პარკში რეაბილიტაციაზე ბოლო მიღება-ჩაბარების აქტი 26 აგვისტოთი თარიღდება — წერია, რომ გრინსერვისი+-მა ჩააბარა, ხოლო მერიის გარემოს დაცვის საქალაქო სამსახურმა მიიღო აკრედიტებული ინსპექტირების ორგანოს, მშენექსპერტის ინსპექტირების ანგარიშით დადასტურებული შადრევნისა და კასკადის სარეაბილიტაციო სამუშაოები.

• ინსპექტირების ანგარიშის დოკუმენტში კი აღნიშნულია, რომ სამუშაოები შესრულებულია საპროექტო-სახარჯთაღრიცხვო დოკუმენტაციის შესაბამისად და შესაბამისობაშია საქართველოში მოქმედ სამშენებლო ნორმებთან და წესებთან.