ქართული ოცნების დეპუტატმა, განათლებისა და მეცნიერების კომიტეტის თავმჯდომარემ გიორგი ამილახვარმა ჟურნალისტს ამ კითხვის დასმის გამო უსაყვედურა და უთხრა: "ამას მეკითხები სერიოზულად?".

დეტალები: მიუხედავად იმისა, რომ კახა კალაძემ გუშინ ვაკის პარკში მცირე კასკადისა და მრგვალი შადრევნის პრეზენტაცია გამართა, ამილახვარი ამტკიცებს, რომ იქ რეკონსტრუქცია მიმდინარეობდა.

  • მას პასუხისმგებლობა გადააქვს მოზარდების მეთვალყურეებზე და ამბობს, რომ "არასრულწლოვან ბავშვს უნდა ჰყავდეს მეთვალყურე, რომ არ მოხდეს იმ ადგილას მისი ჩასვლა, სადაც მიმდინარეობს რეკონსტრუქცია და ბუნებრივია, შეიძლება, მსგავსი ტექნიკური შეფერხებები იყოს";
  • "ამაზე ახლა რამე პასუხისმგებლობას სთხოვ ვის და ამას მეკითხები სერიოზულად? რომ ბურთი ჩაუვარდა ბავშვს...".

რა მოხდა: დღეს, 13 ოქტომბერს ვაკის პარკში ორი ბავშვი შადრევანში ჩავიდა და დენმა დაარტყა, ერთ-ერთი მოზარდი გარდაიცვალა.

  • მომხდარზე გამოძიება სისხლის სამართლის კოდექსი 240-ე პრიმა მუხლით არის დაწყებული, რაც ელექტრო, ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს.
  • თბილისის მერმა თავდაპირველად აღნიშნა, რომ პასუხი მოეთხოვება შესაბამის კომპანიებს, ვინც მუშაობდა რეაბილიტაციისას.
  • შემდეგ ის კლინიკაში მივიდა და ჟურნალისტებთან განაცხადა, რომ მომხდარი უმძიმესი ფაქტია და "ყველა დაისჯება შესაბამისად".
  • კითხვაზე, ხედავს თუა რა თბილისის მერიის პასუხისმგებლობის საკითხს, მან ასე უპასუხა: "რა თქმა უნდა. უდიდესი, უმძიმესი თემა არის, თავზარდაცემულები ვართ. ეს არის ძალიან დიდი პასუხისმგებლობა ყველასი და რა თქმა უნდა, ყველას გაეცემა შესაბამისი პასუხი".