გასული დღის განმავლობაში უკრაინის საჰაერო თავდაცვის ძალებმა მტრის 4 ვერტმფრენი და 26 დრონი გაანადგურეს.

რატომ არის მნიშვნელოვანი: 29 აგვისტოს უკრაინა შეტევაზე გადავიდა, ფრონტის ხაზზე წინ მიიწევს და წარმატებულად ათავისუფლეს დასახლებებს.

• ომის შემსწავლელი ინსტიტუტის განცხადებით, უკრაინის შეტევაზე გადასვლამ ომის მიმდინარეობა შეცვალა, თუმცა ბრძოლები 2023 წლამდე გაგრძელდება.
• მათივე თქმით, ფრონტის ხაზის სტაბილიზაციის შემდეგ უკრაინის ჯარს ახალი შეტევების დაწყება მოუწევს.

დეტალები: ოკუპანტები აგრძელებენ უკრაინული ქალაქების დაბომბვას, უკრაინული მედიის ცნობით, დღეს ორმოცამდე დასახლება ცეცხლში იყო გახვეული.

• ჯამში, მტერმა გასულ დღე-ღამეში უკრაინის ტერიტორიაზე 3 სარაკეტო და 21 საჰაერო დარტყმა განახორციელა.
• უკრაინის შეიარაღებული ძალების გენშტაბის ცნობით, საპასუხოდ, თავდაცვის ძალების ავიაციამ მტერს 32 დარტყმა მიაყენა.
• სამხრეთ უკრაინაში ჩამოაგდეს რუსეთის 6 კამიკაძე დრონი.
• დადასტურებულია იარაღისა და სამხედრო აღჭურვილობის კონცენტრაციის 25-ზე მეტი უბნის, ასევე, ოკუპანტების 7 საზენიტო-სარაკეტო სისტემის განადგურება.

სამხრეთსა და აღმოსავლეთში შეიარაღებული ძალების კონტრშეტევა გრძელდება.

• ხარკოვის რეგიონში და ლიმანის მიმართულებით ელვისებური კონტრშეტევის შემდეგ უკრაინელმა ჯარისკაცებმა განაგრძეს მოძრაობა ლუგანსკის რეგიონში, კრემენნაიასა და სვატოვოსკენ.
• გათავისუფლებულია რამდენიმე დასახლებული პუნქტი, დამპყრობლები თავდაცვის სისტემის აშენებას ცდილობენ.
• 5 ოქტომბერს ლუგანსკის რეგიონული ადმინისტრაციის უფროსმა, სერგეი გაიდაიმ გამოაცხადა რეგიონის დეოკუპაციის დაწყების შესახებ.
• 9 ოქტომბერს ცნობილი გახდა რეგიონის 7 დასახლებული პუნქტის გათავისუფლების შესახებაც.
• გაიდაი ფიქრობს, რომ უკრაინის არმიის წინსვლა ლუგანსკის ოლქში გაგრძელდება, მაგრამ არა ისე სწრაფად, როგორც ხარკოვის რეგიონში, რადგან რუსეთის ჯარებს მომზადების დრო ჰქონდათ.

დონბასში ოკუპანტების ქვედანაყოფებს შეტევის დროებით შეჩერების ბრძანებას აძლევენ, — ამის შესახებ გენშტაბი იუწყება.

• მათი განცხადებით, ამის მთავარი მიზეზი მობილიზებულთა უკიდურესად დაბალი მორალურ-ფსიქოლოგიური მდგომარეობა, დეზერტირობის ფაქტების სიმრავლე და საბრძოლო ბრძანებების შეუსრულებლობაა.
• უკრაინული მედიის ცნობით, დონეცკის რაიონში უკანდახევისას დამპყრობლებმა ააფეთქეს კაშხალი, რის გამოც სოფელი დაიტბორა.
• ოკუპანტებმა მოკლეს 6 მშვიდობიანი მოქალაქეც.

ვითარება რთულია ბახმუტის რაიონში, რომელიც ოკუპანტების სასტიკი და აგრესიული თავდასხმის მსხვერპლია. ამის შესახებ უკრაინის შეიარაღებული ძალების აღმოსავლეთის ჯგუფის სპიკერი სერგეი ჩერევატი იუწყება.

• მისი თქმით, უკრაინელები ცდილობენ, ყველა ღონე გამოიყენონ ამ თავდასხმის მოგერიებისთვის.