საქართველოს მთავრობა ოფიციალური განცხადებით ამ დრომდე არ გამოხმაურებია რუსეთის უსაფრთხოების ფედერალური სამსახურის (FSB) ბრალდებებს.

რატომ არის მნიშვნელოვანი: FSB ამტკიცებს, რომ ყირიმის ხიდის აფეთქებაში მონაწილეობა საქართველოს ორმა მოქალაქემაც მიიღო. აფეთქება, რომელმაც ქერჩის ხიდის დაზიანება გამოიწვია, 8 ოქტომბერს გამთენიისას მოხდა.

• FSB აცხადებს, რომ ტერაქტს უკრაინის თავდაცვის სამინისტროს მთავარი სადაზვერვო სამმართველოს ხელმძღვანელი, კირილ ბუდანოვი, ასევე, "თანამშრომლები და აგენტურა" მეთაურობდნენ.
• რუსეთის უშიშროების ვერსიით, ასაფეთქებელი მოწყობილობა სამშენებლო მასალებში იყო შენიღბული. მათი მტკიცებით, აგვისტოს დასაწყისში ტვირთი თავდაპირველად ოდესის პორტიდან ბულგარეთში, შემდეგ საქართველოში, ფოთის პორტში და ბოლოს სომხეთში გაგზავნეს.
• შემდეგ სომხეთიდან ტვირთი ისევ საქართველოში, ბოლოს კი რუსეთში გაიგზავნა.
• მათი თქმით, გადაცემაში უკრაინისა და სომხეთის მოქალაქეებთან ერთად, საქართველოს ორი მოქალაქეც — სანდრო ინოსარიძე და ბროკერი სახელად, ლევანი მონაწილეობდა.

რას ამბობენ საქართველოში: პირველი კომენტარი მთავრობის წევრებიდან ფინანსთა მინისტრის მოადგილემ ჟურნალისტების დასმული კითხვის საპასუხოდ გააკეთა.

• გიორგი კაკაურიძემ თქვა, რომ საბაჟო საზღვარი არც ტროტილით დატვირთულ და არც სხვა ასაფეთქებელი ნივთიერებებით დატვირთულ ტრაილერს არ გაუვლია.
• მანვე აღნიშნა ისიც, რომ არ აქვს არანაირი ვალდებულება თავი იმართლოს — "თუ ვინმე არგუმენტირებულად დაასაბუთებს, რომ სახელმწიფო საზღვარი გაიარა, მაგ შემთხვევაში გამოძიებაც დაიწყება და პასუხისმგებელი პირებიც იქნებიან".

დეპუტატები: გია ცაგარეიშვილი ფიქრობს, რომ ამ ყველაფერმა "არაჯანსაღი" აჟიოტაჟი არ უნდა გამოიწვიოს. "ნუ ინერვიულებთ, იყავით მშვიდად" — ამბობს დეპუტატი.

• რატი იონათამიშვილი ოკუპანტის ყველა განცხადებაზე კომენტარის გაკეთებას მიზანშეწონილად არ თვლის — "არის რაღაც საკითხები, რაზეც არც უნდა ჩავაგდოთ ღირსად, რომ გვქონდეს კომენტარები";
• "დასწრებაზე ხომ არ არის კომენტარის გაკეთება", — ეს ფრაზა ქართული ოცნების კიდევ ერთ დეპუტატს, ირაკლი ზარქუას ეკუთვნის.

უკრაინა აცხადებს, რომ ყალბი სტრუქტურების განცხადებაზე კომენტარს არ გააკეთებენ.

• "FSB-ის მთელი საქმიანობა სისულელეა. ესენი ყალბი სტრუქტურები არიან, რომელიც პუტინის რეჟიმს ემსახურებიან".

ბულგარეთის მთავრობა კი ამბობს, რომ სატვირთო მანქანა, რომელიც რუსეთის გამოძიების ცნობით, ყირიმის ხიდის აფეთქების საქმეში ფიგურირებს, ბულგარეთში არასდროს ყოფილა.

• "სარწმუნოდ დამტკიცებულია, რომ ყირიმის ხიდზე აფეთქებული სატვირთო მანქანა არასდროს ყოფილა ბულგარეთის რესპუბლიკის ტერიტორიაზე, რომელიც მითითებულია მისი მარშრუტის საწყის წერტილად".

გარდა ამისა, Unian წერს, რომ FSB-მ თავისი "გამოძიების" ფარგლებში გაავრცელა სატვირთო მანქანის რენტგენი, რომელშიც, მათი მტკიცებით, ასაფეთქებელი ნივთიერება იყო.

• თუმცა InformNapal-ის ანალიტიკოსები თვლიან, რომ ასაფეთქებელი ნივთიერება მანქანაში საერთოდ არ ყოფილა, წინააღმდეგ შემთხვევაში რენტგენი მის კვალს აჩვენებდა.
• მეტიც, ექსპერტები აღნიშნავენ, რომ ინციდენტის შემდეგ გამოქვეყნებული ვიდეოების მიხედვით, ყირიმის ხიდზე აფეთქების მიზეზი სატვირთო საერთოდ არ ყოფილა.
• ანალიტიკოსების აზრით, ეს ვერსია FSB-მ მიზანმიმართულად გაავრცელა იმ ეჭვების გასაქარწყლებლად, რომ ამაში ბრალი რუსეთის სპეცსამსახურებს მიუძღვით.