ამის შესახებ ინფორმაციას პროკურატურა ავრცელებს.

რატომ არის მნიშვნელოვანი: სამივე ბრალდებული შეყვანილია ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში, ჯანმრთელობის მძიმე დაზიანებაში, ასევე, ამ დანაშაულთა დაფარვაში ბრალდებულ და მსჯავრდებულ პირთა ოთხოზორია-ტატუნაშვილის სიაში.

  • ბრალდებულები სასამართლომ დამნაშავედ ცნო:
  • ჯგუფურად ჩადენილი ყაჩაღობაში;
  • ორი ან მეტი პირის მიმართ ჩადენილ მკვლელობის მცდელობაში;
  • მძევლად ხელში ჩაგდებასა და თავისუფლების უკანონო აღკვეთაში;
  • ცეცხლსასროლი იარაღის შეძენა, შენახვა, ტარება, გადაზიდვაში.

დეტალები: პროკურატურის ინფორმაციით, სასამართლოში წარდგენილი მტკიცებულებებით დადასტურდა, რომ ბრალდებულებმა 1999 წლიდან 2004 წლამდე პერიოდში, აფხაზეთსა და ზუგდიდში ცეცხლსასროლი იარაღის გამოყენებით მოქალაქეთა მკვლელობის მცდელობა ჩაიდინეს.

  • ასევე, ბრალდებულებმა ყაჩაღური თავდასხმის გზით მოქალაქეებს გასტაცეს პირადი ნივთები და ძვირფასეულობა.
  • გარდა ამისა, ე.წ. გაგრის ჯგუფის წევრებმა, გალის მუნიციპალიტეტის ტერიტორიაზე სხვადასხვა პირს, ცეცხლსასროლი იარაღის გამოყენებით, უკანონოდ აღუკვეთეს თავისუფლება და მძევლად აიყვანეს, რის შემდეგაც ოჯახის წევრებისგან მათ გასათავისუფლებლად მოითხოვეს გამოსასყიდი თანხა.
  • სასამართლომ სამივე ბრალდებული დამნაშავედ ცნო და სასჯელის სახედ და ზომად 12-12 წლით თავისუფლების აღკვეთა განუსაზღვრა.
  • ამნისტიის შესახებ საქართველოს კანონის საფუძველზე, მათ საბოლოოდ 9-9 წლით თავისუფლების აღკვეთა განესაზღვრათ.

გიგა ოთხოზორიას საქმე: ოთხოზორია 2016 წლის 19 მაისს სოფელ ხურჩაში ე.წ მესაზღვრემ მოკლა.

  • ქართულმა მართლმსაჯულებამ მას დაუსწრებლად 14 წლით თავისუფლების აღკვეთა მიუსაჯა.
  • საქართველოს საგარეო საქმეთა სამინისტრომ შემთხვევაზე პასუხისმგებლობა მთლიანად რუსეთის ფედერაციას დააკისრა. რუსეთის საგარეო უწყებამ კი — აფხაზურ მხარეს.

არჩილ ტატუნაშვილის საქმე: არჩილ ტატუნაშვილი 2018 წლის 22 თებერვალს საოკუპაციო რეჟიმმა ახალგორში უკანონოდ დააკავა.

  • საოკუპაციო რეჟიმის განცხადებით, 35 წლის ტატუნაშვილი 23 თებერვლის ღამეს ცხინვალის იზოლატორის კიბეზე დაგორდა და ცხინვალის საავადმყოფოში "გულის უკმარისობით" გარდაიცვალა.
  • ექსპერტიზამ დაადგინა, რომ ტატუნაშვილს სიცოცხლისთვის შეუსაბამო მრავლობითი დაზიანებები აღენიშნებოდა.