საფრანგეთში საქართველოს ყოფილმა ელჩმა, თეა კატუკიამ ფორმულას კითხვებს წერილობით უპასუხა და განაცხადა, რომ ორი თვის წინ საგარეო საქმეთა სამინისტრომ მოკლე სატელეფონო საუბრისას პრემიერმინისტრის სურვილის შესახებ აცნობა.

დეტალები: კატუკია ფორმულასთან ჰყვება, რომ მასზე ზეწოლა საქართველოს პრეზიდენტსა და აღმასრულებელ ხელისუფლებას შორის დაპირისპირების გამწვავებას უკავშირდება.

  • უწყების პასუხად ყოფილი ელჩი მოუწოდებს ყველას, ვისაც ეჭვი ეპარება მის დიპლომატიურ საქმიანობაში, შეფასებისთვის საფრანგეთის საგარეო საქმეთა სამინისტროს მიმართონ.
  • კატუკიას თქმით, მასსა და სამინისტროს შორის უთანხმოება ყოველთვის უკავშირდებოდა საკადრო და სტრუქტურულ საკითხებს.

  • დიპლომატი ამბობს, რომ ძველი საბჭოთა მეთოდებით მის დაშინებას ცდილობენ და ემუქრებიან, რომ ინფორმაციას ფლობენ, რაზეც მათ მიმართავს: "მოუთმენლად ველოდები აღნიშნული ინფორმაციების გაზიარებას!"

რატომ არის მნიშვნელოვანი: პირველ ივლისს თეა კატუკიამ თანამდებობის დატოვების შესახებ განცხადება გაავრცელა და საგარეო საქმეთა სამინისტროს მხრიდან ზეწოლაზე ისაუბრა.

  • საგარეო საქმეთა სამინისტროს თქმით, ელჩმა თანამდებობა წინასწარი კონსულტაციის საფუძველზე დატოვა, რა დროსაც კატუკიას განუმარტეს, რომ ელჩად ყოფნის პერიოდში მისი საქმიანობით "კმაყოფილი არ იყვნენ".

რა თქვა კატუკიამ: ყოფილმა ელჩმა იმ სტრუქტურულ დარღვევებზე ისაუბრა, რასაც მისი თქმით, პოსტზე დანიშვნის შემდეგ აწყდებოდა.

  • "ვერასოდეს წარმოვიდგენდი, რომ ფუნქციის შესრულება მომიწევდა მუდმივი შეურაცხყოფის, ცილისწამების, ზეწოლის, შევიწროებისა და მუქარის კონტექსტში".
  • "არ მიფიქრია, რომ საქართველოს მთავრობისთვის მიუღებელი აღმოჩნდებოდა საზღვარგარეთ ჩემი განვლილი პროფესიული გზა და ჩემი პოლიტიკური მიუკერძოებლობა",
  • მისი თქმით, ეს დარღვევები მნიშვნელოვან ზიანს აყენებს საფრანგეთში საქართველოს წარმომადგენლობის ინტერესებსა და იმიჯს.

რა თქვა სამინისტრომ: უწყება აცხადებს, რომ თეა კატუკიას ბრალდებებით "გაკვირვებული" არიან და ამას "ცილისმწამებლურს" უწოდებენ.

  • "სამწუხაროდ, მან ვერ უზრუნველყო მასზე დაკისრებული უფლება-მოვალეობების ჯეროვნად შესრულება და ევროპის ამ უმნიშვნელოვანეს ქვეყანაში, საქართველოს ინტერესების სათანადოდ დაცვა".
  • უწყება ამბობს, რომ საფრანგეთთან საქართველოს ურთიერთობები უმნიშვნელოვანეს ეტაპზე გადავიდა, რაც საელჩოში ხელმძღვანელ პოზიციაზე "მაღალი კვალიფიკაციისა და გამოცდილების მქონე დიპლომატის მივლინებას" მოითხოვს.