ლიბერალთა და დემოკრატთა ალიანსმა ევროპისთვის (ALDE) საქართველოს ევროკავშირის წევრობის კანდიდატის სტატუსის მიღებაზე რეზოლუციას მხარი დაუჭირა. რეზოლუციის ავტორები სტრატეგია აღმაშენებელი, თავისუფალი დემოკრატები, რესპუბლიკური პარტია, გირჩი — მეტი თავისუფლება და ლელო საქართველოსთვის არიან.

გადაწყვეტილება დღეს, 4 ივნისს დუბლინში გამართულ კონგრესზე იქნა მიღებული. ალიანსმა უკრაინისა და მოლდოვასთვის EU-ს წევრობის კანდიდატის სტატუსის მინიჭებასაც დაუჭირა მხარი.

"ჩვენ ეს შევძელით. რეზოლუცია მიღებულია, ALDE მხარს უჭერს საქართველოს ევროკავშირის კანდიდატის სტატუსის მიღებას", — წერს სტრატეგია აღმაშენებლის ლიდერი, გიორგი ვაშაძე.

საქართველომ ევროკავშირის წევრობის კანდიდატის სტატუსის მიღებაზე განაცხადს ხელი 3 მარტს მოაწერა.