უკრაინულმა მედიამ კრეისერი მოსკოვიდან ჩანაწერი გამოაქვეყნა, რის მიხედვითაც ჩანს, რომ კრეისერზე ორი ნაპრალია გაჩენილი და ეკიპაჟის ევაკუაციას იწყებენ.

"ვადასტურებ ხვრელი წყალსადენის ქვემოთაა, ხიდი მოწყვეტილია, ვიწყებთ ეკიპაჟის პასიურ გადარჩენას", — ისმის ჩანაწერში.

კრეისერის დაბომბვაზე ინფორმაცია 13 აპრილს გავრცელდა. უკრაინული მედია წერდა, რომ იწვოდა რუსული სამხედრო გემი სახელად "მოსკოვი" — სწორედ ის, რომელსაც კუნძულ ზმეინის მცველებმა მიმართულება ომის დაწყებისთანავე მიუთითეს.

15 აპრილს კი უკრაინის პრეზიდენტის ადმინისტრაციის მრჩევლმა, ალექსეი არესტოვიჩმა განაცხადა, რომ "მოსკოვი", რომელიც კუნძულ ზმეინის მცველებმა "ნა ხ*ი" გაუშვეს, იძირება. თუმცა, რუსეთი ამას არ აღიარებდა. თავდაცვის სამინისტრო ამტკიცებდა, რომ გაჩენილი ხანძარი ლოკალიზებული იყო და მუშაობდნენ იმაზე, რომ გემი პორტში ბუქსირით შეეყვანათ.

მოგვიანებით, პენტაგონის პრესმდივანმა, ჯონ კირბიმ CNN-ს განუცხადა, რომ "მოსკოვზე" სერიოზული აფეთქება მოხდა, თუმცა ის სვლას აგრძელებდა. მისივე თქმით, გემი, სავარაუდოდ, სევასტოპოლში შესაკეთებლად გაჩერდებოდა.

რუსული სამხედრო გემის ჩაძირვა კოლოსალური სამხედრო მოვლენაა და მნიშვნელოვნად ამცირებს შავ ზღვაში რუსეთის სამხედრო პოტენციალს. გარდა ამისა, არესტოვიჩი ამბობს, რომ რუსეთისთვის ეს ძლიერი გარტყმაა სახეში და ხომალდის სახელიც სიმბოლურია. როგორც BBC-ის რუსული ბიურო განმარტავს, "მოსკოვი" შავი ზღვის ფლოტის ფლაგმანი იყო და რუსულ ფლოტში ყველაზე ძლიერ შეიარაღებად ითვლებოდა.