14 მაისიდან რუსული Inter RAO-ს შვილობილი კომპანიაა RAO Nordic Oy ფინეთს ელექტროენერგიის მიწოდებას უწყვეტს. მიზეზად ისინი 6 მაისის შემდეგ გაყიდული ელექტროენერგიის საფასურის გადაუხდელობას ასახელებენ.

განცხადება მას შემდეგ გაკეთდა, რაც ფინეთმა NATO-ში გაწევრიანების სურვილი გამოთქვა. ფინეთის ელექტროქსელის კომპანია Fingrid აცხადებს, რომ ექსპორტის შეჩერება პრობლემას არ შექმნის, რადგან ქვეყანა რუსეთიდან მთლიანი მოხმარების ელექტროენერგიის მხოლოდ 10%-ს ყიდულობს. დეფიციტს კი შვედეთიდან ელექტროენერგიის იმპორტისა და საკუთარი წარმოების გაზრდით აანაზღაურებს.

12 მაისს ფინეთის პრემიერმინისტრმა და პრეზიდენტმა განაცხადეს, რომ ქვეყნის NATO-ში გაწევრიანების განაცხადი დაუყოვნებლივ უნდა გაკეთდეს. ერთობლივ განცხადებაში ფინეთის პრეზიდენტმა, საული ნიინისტემ და პრემიერმინისტრმა, სანა მარინიმ არნიშნეს, რომ NATO-ში გაწევრიანება ფინეთის უსაფრთხოებას გააძლიერებს, როგორც NATO-ს წევრი, ფინეთი გააძლიერებს მთელ თავდაცვის ალიანსს.

26 აპრილს BBC-მ გაავრცელა ინფორმაცია, რომ ფინეთი და შვედეთი NATO-ში გაწევრიანებაზე განცხადების გაკეთებას მაისში გეგმავენ. რუსეთის საგარეო საქმეთა სამინისტრო ფინეთსა და შვედეთს NATO-ში გაწევრიანების შემთხვევაში მოსალოდნელი შედეგების შესახებ აფრთხილებს.

20 აპრილს რუსეთის საგარეო საქმეთა სამინისტროს პრესსპიკერმა განაცხადა, რომ ამ ქვეყნის ლიდერებს უნდა ესმოდეთ, ასეთი ნაბიჯების შედეგები რუსეთთან ორმხრივ ურთიერთობებსა და ევროპის უსაფრთხოების არქიტექტურაზე.

ამავე თემაზე: