სახელმწიფო უსაფრთხოების სამსახურის ცნობით, ოკუპირებულ ცხინვალში უკანონოდ დაკავებულ მამუკა ჩხიკვაძეს 5 წლითა და 6 თვით უკანონო პატიმრობა მიესაჯა. სუს-ის განცხადებით, ამ გადაწყვეტილებას წინ უძღოდა რუსეთის საოკუპაციო ძალების მიერ ჩხიკვაძის უკანონოდ დაკავება და მის წინააღმდეგ გამოგონილი ბრალდებების წაყენება.

"მამუკა ჩხიკვაძისთვის უკანონო პატიმრობის მისჯამ კიდევ ერთხელ წარმოაჩინა ოკუპაციის არაჰუმანური და დანაშაულებრივი არსი, რომელზეც სრული პასუხისმგებლობა ეკისრება რუსეთის ფედერაციას, როგორც ოკუპირებულ ტერიტორიებზე კონტროლის განმახორციელებელ ძალას", — ვკითხულობთ განცხადებაში.

სუს-ის განცხადებით, მამუკა ჩხიკვაძის უკანონო პატიმრობის პირველივე დღიდან რეგულარულად აქტიურდება ცხელი ხაზი და მისი უპირობო გათავისუფლების საკითხი აქტიურად განიხილება ინციდენტების პრევენციისა და მათზე რეაგირების მექანიზმის შეხვედრებზე.

მამუკა ჩხიკვაძე საოკუპაციო რეჟიმის წარმომადგენლებმა 12 დეკემბერს, სოფელ ზემო ნიქოზის მიმდებარე ტერიტორიიდან გაიტაცეს. 18 დეკემბერს ცხინვალის დე ფაქტო სასამართლომ მას 2 თვით პატიმრობა შეუფარდა.