რუსეთის საგარეო საქმეთა მინისტრი, სერგეი ლავროვი ორდღიანი სამუშაო ვიზიტით უკვე სოხუმში იმყოფება. ჩასვლისას მას დე-ფაქტო რესპუბლიკის ხელისუფლება, მათ შორის პრეზიდენტი რაულ ხაჯიმბა დახვდა.

18-19 აპრილს, ვიზიტის ფარგლებში, საოკუპაციო რეჟიმის წარმომადგენლებთან შეხვედრის პარალელურად, ლავროვი მონაწილეობას მიიღებს ოკუპირებულ რეგიონში რუსეთის ფედერაციის ე.წ. საელჩოს ახალი შენობის გახსნის საზეიმო ღონისძიებაში.

საგარეო საქმეთა სამინისტრომ, ლავროვის სოხუმში ვიზიტი, მოსკოვის პროვოკაციული პოლიტიკის გაგრძელებად შეაფასა, რომელიც მათივე განცხადებით, მიზნად ისახავს ეთნიკური წმენდისა და სამხედრო ოკუპაციის მეშვეობით სუვერენული სახელმწიფოს საზღვრების ძალადობრივი ცვლილების დაკანონებას.

საქართველოს პრეზიდენტი, გიორგი მარგველაშვილი საერთაშორისო თანამეგობრობას მოუწოდებს, დაგმოს აფხაზეთში რუსეთის ფედერაციის საგარეო საქმეთა მინისტრის, სერგეი ლავროვის ვიზიტი და რუსეთის ფედერაციის ე.წ. საელჩოს გახსნა.

მისი შეფასებით, რუსეთის ფედერაციის მცდელობები ეწინააღმდეგება 2008 წლის 12 აგვისტოს შეთანხმებასა და საერთაშორისო სამართლის ძირეულ პრინციპებს.

დღესვე, ამავე თემას გამოეხმაურა დე ფაქტო აფხაზეთის საგარეო საქმეთა სამინისტრო და ქართველ პოლიტიკოსებს მოუწოდა, "შეწყვიტონ საკუთარი თავისა და საერთაშორისო საზოგადოების მოტყუება."

მათ მიერ გავრცელებულ განცხადებაში წერია, რომ აღნიშნული სამუშაო ვიზიტი "სრულად პასუხობს რუსეთ-აფხაზეთის ურთიერთობებსა და შეესაბამება საერთაშორისო სამართალს".