უკრაინის საგარეო საქმეთა მინისტრის, დმიტრო კულებას განცხადებით, ევროკავშირის უმაღლეს წარმომადგენელთან საგარეო საქმეთა და უსაფრთხოების საკითხებში ჯოზეფ ბორელთან საუბრის შემდეგ, დადასტურდა, რომ რუსეთის წინააღმდეგ მძიმე სანქციების პაკეტი მზადაა. მისი თმით, ევროკავშირი დამატებით ძალისხმევას გამოიყენებს უკრაინის პოლიტიკური და ფინანსური მხარდაჭერისთვის.

"ვისაუბრე ჯოზეფ ბორელთან, უსაფრთხოებასთან დაკავშირებულ მიმდინარე ვითარებაზე. დადასტურებულია, რომ რუსეთის წინააღმდეგ მძიმე სანქციების პაკეტი მზად არის. ევროკავშირი დამატებით ძალისხმევას გამოიყენებს უკრაინის პოლიტიკური და ფინანსური მხარდაჭერისთვის. მადლობელი ვარ მტკიცე პოზიციისა და გადამწყვეტი მოქმედებებისთვის მზადყოფნისთვის", — წერს კულება Twitter-ზე.

როგორც ის ამბობს, ასევე ესაუბრა აშშ-ის სახელმწიფო მდივანს, ენტონი ბლინკენსა და გერმანიის საგარეო საქმეთა მინისტრს ანალენა ბაერბოკს. კულებას თქმით, უკრაინა და მისი მეგობრები მზად არიან გადამწყვეტი ნაბიჯებისთვის უკრაინის დასაცავად.

გუშინ, 11 თებერვალს ამერიკის შეერთებული შტატების სახელმწიფო მდივნმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას.

მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა.

გაიგე მეტი: