ესპანურმა კომპანიამ, აქუალიამ 180 მილიონი აშშ დოლარის მოცულობის ინვესტიცია განახორციელა, რის სანაცვლოდაც კომპანია Georgian Water and Power-ის 80%-იანი წილი შეიძინა. დანარჩენი 20%-იანი წილის მფლობელი კვლავ საქართველოს კაპიტალია.

საქართველოს პრემიერმინისტრმა, ირაკლი ღარიბაშვილმა ინვესტორთან ონლაინ-შეხვედრაზე თქვა, რომ $180-მილიონიანი ინვესტიცია მნიშვნელოვნად შეუწყობს ხელს საქართველოს წყალმომარაგების სექტორს და მენეჯმენტის ხარისხობრივ განვითარებას. ღარიბაშვილის თქმით, საქართველო სანდო და სტაბილური ბიზნესპარტნიორია.

პრემიერმინისტრმა აღნიშნა, რომ 2021 წლის საქართველოს ეკონომიკის ზრდის ტემპი 10,6% იყო. მისი თქმით, საქართველომ ბოლო ათწლეულის განმავლობაში მნიშვნელოვანი ტრანსფორმაცია განიცადა და მსოფლიოში ერთ-ერთი ყველაზე დაბალი საგადასახადო განაკვეთით და სახელმწიფო სერვისების ხელმისაწვდომობით სწრაფად მიიწევდა უფრო ლიბერალური და თავისუფალი საბაზრო ეკონომიკისკენ.

ღარიბაშვილის თქმით, მთავრობა როგორც სახმელეთო, ისე საზღვაო და სარკინიგზო ინფრასტრუქტურის განვითარებაში დიდ ინვესტიციებს ახორციელებს.