შალვა ამირანაშვილის სახელობის ხელოვნების სახელმწიფო მუზეუმის ყოფილი მმართველის, ეკა კიკაძის ინფორმაციით, მუზეუმიდან კიდევ ერთი თანამშრომელი, მაკო მაჭარაშვილი გაათავისუფლეს. ის ამ გადაწყვეტილებას კულტურის მინისტრს, თეა წულუკიანს უკავშირებს. აღსანიშნავია, რომ თავად კიკნაძე რამდენიმე თვის წინ, სწორედ წულიკიანის მინისტრად დანიშვნის შემდეგ, მუზეუმის ხელმძღვანელობიდან ლაბორანტის პოზიციაზე გადაიტანეს.

"დღეს კიდევ ერთმა თანამშრომელმა მიიღო ბრძანება გათავისუფლების შესახებ. ეს არის მაკო მაჭარაშვილი, რომელიც 10 წელზე მეტია მუშაობს მუზეუმში. ის იყო ძალიან მნიშვნელოვანი წევრი ჩვენი გუნდის და ალბათ, უკანასკნელი წარმომადგენელი თავის თაობისა ხელოვნების მუზეუმში. ამ თაობის იქ უკვე აღარავინ აღარ დარჩა, სამწუხაროდ [...]

ხელოვნების მუზეუმში პრაქტიკულად აღარ დარჩა ეროვნული მუზეუმის გუნდი. თეა წულუკიანმა აბსოლუტურად გაწმინდა ხელოვნების მუზეუმი ჩვენგან, რომლებიც მან თავიდანვე მიიჩნია ხალხის მტრებად და თავიდანვე ღიად გამოგვიცხადა, რომ ჩვენი ადგილი იქ არ იყო", — განაცხადა კიკნაძემ ფორმულასთან საუბრისას.

ხვალ, 14:00 საათზე კულტურის სამინისტროსთან "განხორციელებული ბოლშევიკური წმენდის გასაპროტესტებლად" საპროტესტო აქცია გაიმართება. აქციის სლოგანებია "დიდება პარტიას, კულტურის მტრების გამოვლენისთვის!" და "კულьტ УРА საიმედო ხელშია!".

ხელოვნების მუზეუმის ირგვლივ ხმაური მას შემდეგ დაიწყო, რაც გასული წლის ივლისში თეა წულუკიანმა განაცხადა, რომ მუზეუმის შენობის გაძლიერება "რენტაბელური" არ იქნებოდა. რამდენიმედღიანი გაურკვევლობისა და კრიტიკის შემდეგ, სამინისტრომ განაცხადა, რომ შენობის რესტავრაცია იგეგმება, ხელოვნების სახელმწიფო მუზეუმი "მართვის განსაკუთრებულ რეჟიმზეა" გადასული და შენობიდან ექსპონატების გატანა დაიწყო.

შენობიდან ექსპონატების გატანის იდეას კითხვები მოჰყვა მათ ბედსა და "ევაკუაციის გეგმასთან" დაკავშირებით. ამ კითხვებს მუზეუმის თანამშრომლებიც სვამდნენ, რომლებიც აცხადებდნენ, რომ მინისტრმა გადაწყვეტილება მათთან შეუთანხმებლად, ერთპიროვნულად მიიღო. ეკა კიკნაძე 31 ივლისს "ჩამოალაბორანტეს". 14 ნოემბერს ხელოვნების მუზეუმის დირექტორის თანაშემწემ, დავით ნიორაძემ თანამდებობა დატოვა. რამდენიმე დღეში მას მუზეუმის კიდევ სამი თანამშრომელი მიჰყვა. მას შემდეგ მუზეუმი არაერთმა ადამიანმა დატოვა, ნაწილი კი გაათავისუფლეს. გასულ წლის დეკემბერს მუზეუმში რეორგანიზაცია ოფიციალურად დაიწყო. 14 იანვარს კულტურის სამინისტროში განაცხადეს, რომ რეორგანიზაციის შედეგად, მუზეუმთა ჯგუფში საშტატო პოზიციები 175-დან 146-მდე შემცირდა.

გაიგე მეტი: