შს მინისტრის ყოფილმა მოადგილემ გელა ხვედელიძემ კურიერ P.S.-ში ნოდარ მელაძესთან ინტერვიუსას, მასზე განხორციელებულ თავდასხმაზე ისაუბრა. მისი განცხადებით, იქედან გამომდინარე, რომ იგი სხვადასხვა მნიშვნელოვანი ინფორმაციის მატარებელია, მისი ეჭვით, სუს-ის უფროსის მოადგილეს, იოსებ გოგაშვილს შეეძლო მასზე თავდასხმის დაგეგმვა:

"მე სულ თვალთვალის ობიექტი ვარ, ინფორმაცია გამაჩნია, ვიღებ ინფორმაციას და ყოველთვის ინტერესის სფეროში ვარ. ყველამ ძალიან კარგად იცის ეს და მათ შორის გოგაშვილმაც კარგად იცის. სწორედ ის ახორციელებდა ჩემს მიმართ გარკვეულ ღონისძიებებს, თვალთვალის კუთხით".

ხვედელიძის თქმით, იგი სუს-ის უფროსის მოადგილის, იოსებ გოგაშვილის გარდა, სხვას არავის განიხილავს, ვისაც შეეძლო მასზე თავდასხმის განხორციელება.

გელა ხვედელიძე ამბობს, რომ სამართალდამცავებს საქმის მასალები საშუალებას აძლევს მარტივად დაადგინონ თავდამსხმელთა ვინაობა:

"როდესაც ქალაქის ცენტრში ასეთ თავდასხმას ახორციელებენ, იქ ორნი არ იქნებოდნენ, იქ იქნებოდა კიდევ მინიმუმ ორი პირი, რომლებიც მათ კოორდინირებას ახორციელებდნენ. თუკი კარგად იმუშავებს სამართალდამცავი სტრუქტურა ფაქტობრივად შესაძლებელია მივიდნენ და დაადგინონ ის პირები, მითუმეტეს თითის ანაბეჭდებიც არსებობს".

რუსთავი 2-ის ჟურნალისტი შეხვდა სახელმწიფო უსაფრთხოების სამსახურის უფროსის მოადგილეს იოსებ გოგაშვილს და გელა ხვედელიძის ბრალდებებზე დაუსვა კითხვები, თუმცა, მან არცერთ შეკითხვას არ უპასუხა და განაცხადა, რომ "ბრალდებები სასაცილოა".

გელა ხვედელიძეს 3 აპრილს საკუთარ სახლთან თავს დაესხნენ. შსს-ს ცნობით, გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.

გელა ხვედელიძე შინაგან საქმეთა სამინისტროში ირაკლი ღარიბაშვილის მინისტრობისას მუშაობდა. 2013 წლის მაისში გელა ხვედელიძე დააკავეს ერთ-ერთი მოქალაქის პირადი ცხოვრების ამსახველი კადრების გავრცელების ბრალდებით. ხვედელიძე თავდაპირველად ბრალს აღიარებდა, მოგვიანებით კი მან ჩვენება შეცვალა. ბრალდებულმა მაღალჩინოსანმა საპატიმრო მაშინ გირაოს საფუძველზე დატოვა, მოგვიანებით, ის სასამართლომ დამნაშავედ სცნო წარდგენილ ბრალდებაში და ერთწლიანი პირობითი სასჯელი მიუსაჯა.