შს მინისტრის ყოფილი მოადგილის, გელა ხვედელიძის თავდასხმასთან დაკავშირებით, მისი ცოლი, მარეხი ფერაძე რუსთავი 2-თან საუბრისას, უარყოფს რაიმე სახის მუქარას ქმრის მიმართ და ჰყვება, რომ სახლიდან გამოსვლისას, დღეს, 3 აპრილს, ორი ნიღბიანი თავს დაესხა:

"სახლიდან გამოვედი და როგორც ჩანს ორი ნიღბიანი ელოდებოდა. მეუღლე საუბრობდა ტელეფონზე და უცებ დაესხნენ თავს, ფეხებით, წიხლებით ურტყამდნენ. არავითარი მუქარა არ ყოფილა. ვცდილობდი, რომ ეს ნიღაბი ჩამომეხსნა, მაგრამ ვერ შევძელი და უცებ გაიქცნენ. შემდეგ გამოვიძახე საპატრულო და სასწრაფოც".

გაზეთ ქრონიკა პლიუსის რედაქტორის ელისო კილაძის მტკიცებით, გელა ხვედელიძეზე თავდასხმა, სახელმწიფო უსაფრთხოების სამსახურის ხელმძღვანელის მოადგილის, იოსებ გოგაშვილის შურისძიება იყო, რომლის შესახებაც შესაბამისი გზავნილები მათ ჯერ კიდევ გუშინ მიიღეს. ელისო კილაძემ ხვედელიძის საქმეზე დღეს, 15 საათზე, ბრიფინგი ჩანიშნა.

შსს-ს ცნობით, გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს. უწყების ცნობით, ამ დროისთვის საგამოძიებო მოქმედებები მიმდინარეობს და დამატებით ინფორმაციას ვერ გაავრცელებენ.

გელა ხვედელიძე შინაგან საქმეთა სამინისტროში ირაკლი ღარიბაშვილის მინისტრობისას მუშაობდა. 2013 წლის მაისში გელა ხვედელიძე დააკავეს ერთ-ერთი მოქალაქის პირადი ცხოვრების ამსახველი კადრების გავრცელების ბრალდებით. ხვედელიძე თავდაპირველად ბრალს აღიარებდა, მოგვიანებით კი მან ჩვენება შეცვალა. ბრალდებულმა მაღალჩინოსანმა საპატიმრო მაშინ გირაოს საფუძველზე დატოვა, მოგვიანებით, ის სასამართლომ დამნაშავედ სცნო წარდგენილ ბრალდებაში და ერთწლიანი პირობითი სასჯელი მიუსაჯა.