ექსპრეზიდენტის მხარდასაჭერი მსვლელობა პრეზიდენტის სასახლესთან დასრულდა. აქციის მონაწილეები სალომე ზურაბიშვილის რეზიდენციასთან შეიკრიბნენ და შეძახილებით "მონა" მიხეილ სააკაშვილის პატიმრობის ირგვლივ მიმდინარე მოვლენები გააპროტესტეს, მათ შორის, ზურაბიშვილის გადაწყვეტილება არ შეიწყალოს მესამე პრეზიდენტი.

დღეს სააკაშვილის მხარდამჭერებმა მსვლელობა ავლაბრის მეტროდან დაიწყეს და სანაპიროზე წავიდნენ, რაც წინასწარვე იყო დაანონსებული. თუმცა მოგვიანებით, ნაციონალური მოძრაობის ლიდერმა, ნიკა მელიამ მსვლელობის გზა შეცვალა. ოპოზიციის აქციის პარალელურად სანაპიროზე საპოლიციო სპეცტექნიკა, მათ შორის, წყლის ჭავლისა და სახანძროს მანქანები, ასევე, სპეცრაზმი იყო მობილიზებული. სპეცტექნიკა შსს-მ იუსტიციისა და შინაგან საქმეთა სამინისტროებთანაც მიიყვანა, თუმცა სააკაშვილის მხარდამჭერები მსვლელობით იქ არ მისულან.

აღნიშნულზე ნაციონალური მოძრაობის თავმჯდომარემ, ნიკა მელიამ განაცხადა, რომ უწყება სპეცრაზმს "წინ და უკან არბენინებდა", რადგან ვერ გაეგო რას აკეთებდნენ აქციის მონაწილეები. მისი თქმით, ამით კიდევ ერთხელ დაანახეს ყველას, რომ მათი პროტესტის არაძალადობრივია.

"ძალიან ტრაგი-კომიკური ვითარება არის შინაგან საქმეთა სამინისტროს ყველა დანაყოფში შექმნილი. არბენინებენ წინ და უკან, ვერ გაიგეს რას ვაკეთებთ და ვერც გაიგებენ, იმიტომ, რომ ის ძალა, რომელიც ეწინააღმდეგება რეჟიმს გაცილებით დიდი ინტელექტუალური, პასუხისმგებლიანი, მორალური, ზნეობრივი უპირატესობით სარგებლობს, ვიდრე მათ წარმოუდგენიათ", — განაცხადა მელიამ.

ნიკა მელიამ აქცია და ორივე სანაპიროზე გზის გადაკეტვა გუშინ, 14 ნოემბერს დააანონსა. ამას დღეს შსს-ს განცხადება მოჰყვა, სადაც უწყება ამბობდა, რომ "საჭიროების შემთხვევაში, საზოგადოებრივი წესრიგის აღდგენის მიზნით, კანონით გათვალისწინებულ პროპორციულ ძალასა და სპეციალურ საშუალებებს გამოიყენებდნენ".

ნაციონალური მოძრაობის შეფასებით, უწყების ეს განცხადება მშვიდობიანი დემონსტრანტების დაკავებების დაანონსება იყო. პარტიის თქმით, ყველა შესაბამისი უწყება 14 ნოემბერს საჯაროდ იმიტომ გააფრთხილეს, რომ მომდევნო დღეს მშვიდობიანი მსვლელობა ყოფილიყო და მათ მოქალაქეთა უფლებების დასაცავად შესაბამისი ზომები მიეღოთ.

დღეს პენიტენციურმა სამსახურმა ისევ უარი თქვა სააკაშვილის სხდომაზე გადაყვანაზე. მათ არგუმენტად სუს-ს მიერ გავრცელებული ინფორმაცია მოიყვანეს და აღნიშნეს, რომ სააკაშვილის გადაყვანის ხელის შეშლის მიზნით "დესტრუქციული" ქმედებები იგეგმებოდა. კერძოდ, სუს-ზე დაყრდნობით პენიტენციური აცხადებდა, რომ გადაყვანის დროს იგეგმებოდა გზების ბლოკირება, რაშიც 600-მდე მანქანა მიიღებდა მონაწილეობას, რაც უკონტროლო სიტუაციასა და ქაოსს გამოიწვევდა.

პარალელურად, თბილისის საქალაქო სასამართლოში ე.წ. პიჯაკების საქმეზე მიხეილ სააკაშვილის პროცესი მიმდინარეობდა. როგორც ადვოკატების, ასევე, ექსპრეზიდენტის მოთხოვნაა, რომ ის სასამართლო სხდომებს დაესწროს. მიუხედავად ამისა, სასამართლოში ის არც წინა პროცესზე მიიყვანეს. ამ შემთხვევაშიც პენიტენციური სამსახური "დესტრუქციასა და ჯანმრთელობის რისკებზე" საუბრობდა.

სააკაშვილი უკვე 46-ე დღეა შიმშილობს. ის და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — სამოქალაქო კლინიკის ნაცვლად ის გლდანის ციხის სამკურნალო დაწესებულებაში მოათავსეს, სადაც იძულებით შეიყვანეს. სააკაშვილი იქ მკურნალობაზე უარს ამბობს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

სააკაშვილის სამოქალაქო კლინიკაში გადაყვანის მოთხოვნით პეტიციაც შეიქმნა. ხელმომწერები პირობას დებენ, რომ იქამდე, სანამ სააკაშვილი ამ კლინიკაში იქნება, ტერიტორიასთან აქციას არ გამართავენ.