ქუთაისში მომუშავე ექიმებმა ექსპრეზიდენტის მრავალპროფილურ კლინიკაში დაუყონებლივ გადაყვანას მოითხოვნით აქცია გამართეს და განცხადებით მოქმედ პრეზიდენტს, სალომე ზურაბიშვილსა და პრემიერმინისტრ ირაკლი ღარიბაშვილს მიმართეს. მათი თქმით, გლდანის მე-18 სამედიცინო დაწესებულება სააკაშვილის ჯანმრთელობისა და სიცოცხლის დაცვას ვერ უზრუნველყოფს.

"ჩვენ ყოველდღიურად ვუყურებთ როგორ მძიმდება საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობა, რომელიც 47-ე დღეა, შიმშილობს. გლდანის სასჯელაღსრულების სისტემის მე-18 სამკურნალო დაწესებულება ვერ უზრუნველყოფს მისი სიცოცხლისა და ჯანმრთელობის ფუნდამენტურ და აბსოლუტურ უფლებას. ამიტომ, კატეგორიულად მოვითხოვთ მიხეილ სააკაშვილი გადაიყვანოთ პოლიპროფილურ სტაციონარში, რათა მოხერხდეს მისთვის კვალიფიციური სამედიცინო სერვისის მიწოდება", — აცხადებენ ისინი.

ექიმების მიმართვაში, რომელსაც ადგილობრივი მედია ავრცელებს, ნათქვამია, რომ თავისუფლებაღკვეთილი პირების ჯანმრთელობის დაცვის ხელმისაწვდომობა საერთაშორისო სტანდარტებითა და საქართველოს კანონმდებლობითაა განსაზღვრული. ამასთან, ისინი სამედიცინო დარგის სხვა წარმომადგენლებსაც მოუწოდებენ, რომ მათ მოთხოვნას შეუერთდნენ და აღნიშნავენ, რომ ეს ყველა ექიმის მორალური და პროფესიული ვალდებულებაა.

ექსპრეზიდენტი უკვე 46-ე დღეა შიმშილობს. 13 ნოემბერს მისმა ექიმმა განაცხადა, რომ სააკაშვილი თავს ცუდად გრძნობდა და საწოლიდან ვერ ადგა. 14 ნოემბერს მან აღნიშნა, რომ ექსპრეზიდენტი სუსტად არის, მაგრამ სასამართლო პროცესზე დასწრება შეუძლია.

ამავე დღეს, სხვადასხვა მედიასაშუალება ავრცელებდა ინფორმაციას, რომ კონსილიუმის წევრებს პენიტენციური სამსახურიდან აცნობეს, თითქოს ექსპრეზიდენტს მათთან შეხვედრა არ სურს. სააკაშვილის ნახვის შემდეგ ადვოკატმა, შოთა თუთბერიძემ განაცხადა, რომ ეს სიცრუეა, ექსპრეზიდენტი თანახმაა და კონსილიუმს აცნობეს მისი პოზიცია, ამიტომ ექიმებს ელოდებოდნენ. თუმცა, მოგვიანებით მან თქვა, რომ ორსაათიანი ლოდინის შემდეგ, არასამუსაო საათების მიზეზით ექიმები ციხეში არ შეუშვეს.