საპატრიარქოს საზოგადოებასთან ურთიერთობის ხელმძღვანელის, ანდრია ჯაღმაიძის განცხადებით, პატრიარქთან შეუთანხმებლად არცერთი განცხადება არ კეთდება.

"ერთი რამ უნდა ითქვას აუცილებლად, რომ როდესაც საპატრიარქო აკეთებს განცხადებას, არავინ არ უნდა იფიქროს, რომ ეს განცხადება არის რაღაც ჯგუფის აზრი პატრიარქთან შეუთანხმებელი. საპატრიარქო, ადმინისტრაცია ეხმარება პატრიარქს ადმინისტრირებაში, საქმის წარმართვაში, ამიტომ არცერთი განცხადება შეუთანხმებლად, ისე, რომ პატრიარქმა არ იცოდეს შინაარსი და არ იცოდეს რას ემსახურება და არ ჰქონდეს წაკითხული და თანხმობა არ იყოს მისგან, ასეთი განცხადება არ იდება არასდროს", — განაცხადა მან მაესტროს ეთერში.

მან მეუფე ნიკოლოზთან დაკავშირებით გაკეთებულ განცხადებასთან თქვა, რომ უნდა შეესრულებინა მისია და შეეჩერებინა ეკლესიის პოლიტიკაში ძალით შეყვანის პროცესი შეეჩერებინა.

"პირველ რიგში, უნდა ვთქვა აუცილებლად, რომ მეუფე ნიკოლოზის ღვაწლი და შრომა ძალიან დიდია და ძალიან საპატივცემულო ადამიანი არის ჩვენს ეკლესიაში. დიდი ხნის მღვდელმთავარია და ბევრი საქმე აქვს შესაბამისად გაკეთებული ეკლესიის სასიკეთოდ. ძალიან უცნაური რამ პროცესები გამოიწვია სხვა განცხადებებმა, პირველ რიგში, მინდა განცხადების შესახებ ის ვთქვა, რომ ეს განცხადება არ ეხება უშუალოდ მიხეილ სააკაშვილს.

ამ განცხადებას უნდა შეესრულებინა ასეთი მისია, რომ ბოლო პერიოდში ეკლესიის პოლიტიკაში ძალით შეყვანის პროცესი უნდა შეეჩერებინა. ჩვენ ვნახეთ, დიდი ხანია ვამბობთ ამას, რომ ეკლესიას თავის ფუნქცია აქვს, გამერთიანებელი ფუნქცია აქვს და ნუ დაიკავებთ ეკლესიის მიმართ რაღაც რადიკალურ პოზიციას იმიტომ, რომ როდესაც ეს შეეხება უკვე უშუალოდ ფუნდამენტურ შეხედულებებს, რაც ეკლესიაში არსებობს, ჩვენ მოგვიწევს ამაზე რეაგირება. გამოდის მერე, რომ ვიღაცის სასარგებლოდ არის, ან ვიღაცის საწინააღმდეგოდ არის. ნებისმიერი ჩვენგანი დღეს სატელევიზიო გამოსვლაში რისკავს, რომ სიტყვა, რომელსაც მოუზომელად იტყვის,შეიძლება გატანილ იქნეს იმ ველზე, სადაც მხოლოდ პოლიტიკური ნიშნით ზომავენ ამას", — თქვა მან.

10 ნოემბერს საპატრიარქომ განცხადება გაავრცელა, სადაც ისინი ახალქალაქის, კუმურდოსა და კარის მიტროპოლიტი ნიკოლოზის მიერ მიხეილ სააკაშვილთან დაკავშირებით გაკეთებულ განცხადებებს გამოეხმაურნენ და თქვეს, რომ იმედი აქვთ, მეუფე ასეთ გადაცდომებს მომავალში აღარ დაუშვებს.