შალვა ამირანაშვილის სახელობის, ხელოვნების მუზეუმის დირექტორის თანაშემწემ, დავით ნიორაძემ თანამდებობა დატოვა. როგორც ნიორაძე აცხადებს, ის ადმინისტრაციულ პოლიტიკასა და სამუზეუმო საქმის მიმართ მიდგომას კატეგორიულად არ ეთანხმებოდა, მსგავსი ადმინისტრაციული დეპარტამენტის წევრობა არ სურდა და ამ მიზეზით, უფრო დაბალ, კურატორის თანაშემწის პოზიციაზე გადასვლა უნდოდა.

"არაერთხელ დამიფიქსირებია ჩემი პოზიცია მუზეუმის ბოლოდროინდელ ამბებთან დაკავშირებით. საჯაროდ, პროფესიულ წრეებში. ამ ნაბიჯის გადადგმა დროის ამბავი იყო, მაგრამ ბევრი რამე მაკავებდა: ჩემთვის ძალიან ძვირფასი ადამიანები და საქმე, რომელსაც ამდენი წელია ვაკეთებ და ძალიან მიყვარს. ჩემი მოთხოვნა იყო: დირექტორის თანაშემწის პოზიციიდან კურატორის თანაშემწის პოზიციაზე გადაყვანა, უფრო დაბალ პოზიციაზე, უფრო დაბალი ხელფასით. იმიტომ, რომ არ მინდოდა ადმინისტრაციული დეპარტამენტის წევრობა, რომლის ადმინისტრაციულ პოლიტიკასა და სამუზეუმო საქმისადმი მიდგომას კატეგორიულად არ ვეთანხმები", — წერს ნიორაძე Facebook გვერდზე.

ნიორაძის თქმით, მან მუზეუმის ახალი დირექტორისგან მოთხოვნაზე უარი მიიღო და არჩევანი ახალ ხელშეკრულებაზე დათანხმებასა და პოზიციის დატოვებას შორის ჰქონდა, რის შემდეგად თანამდებობიდან გადადგა.

"გული მწყდება მუზეუმის ძალიან ბუნდოვან მომავალზე. ჩემთვის ძვირფას ადამიანებს ვუხდი ბოდიშს. ეს ჩემი მტკიცე პოზიციაა! თუ ამ არჩევანის წინაშე მაყენებენ, გადაწყვეტილების მიღება არ არის ძნელი", — ამბობს ის.

4 ივლისს კულტურის მინისტრმა, თეა წულუკიანმა განაცხადა, რომ შალვა ამირანაშვილის სახელობის ხელოვნების სახელმწიფო მუზეუმის შენობის გაძლიერება "რენტაბელური" არ იქნებოდა. ამ სამუზეუმო ფონდში ქვეყნის ეროვნული საგანძურის ყველაზე მნიშვნელოვანი ნაწილი ინახება და შენობასაც კულტურული მემკვიდრეობის ძეგლის სტატუსი აქვს, ამიტომ განცხადებებს პროტესტი მოჰყვა. რამდენიმედღიანი გაურკვევლობისა და კრიტიკის შემდეგ, სამინისტრომ განაცხადა, რომ შენობის რესტავრაცია იგეგმება. ხელოვნების სახელმწიფო მუზეუმი "მართვის განსაკუთრებულ რეჟიმზეა" გადასული და შენობიდან ექსპონატების გატანა დაიწყო.