შიმშილობას ნაციონალური მოძრაობის კიდევ ერთი წევრი, გიორგი ბარამიძე იწყებს. მას შემდეგ, რაც ცნობილი გახდა, რომ პარლამენტში ექსპრეზიდენტ მიხეილ სააკაშვილის მრავალპროფილურ კლინიკაში გადაყვანის მოთხოვნით შიმშილობას ენმ-ს 9 დეპუტატი იწყებს, ბარამიძე თანაგუნდელებს შეუერთდა. მისივე თქმით, რადგან დეპუტატი არ არის, ის არა საკანონმდებლო ორგანოს შენობაში, არამედ პარტიის ოფისში იშიმშილებს.

"ჩემმა მეგობარმა პარლამენტის წევრებმა, პარლამენტის შენობაში პრეზიდენტ სააკაშვილის მულტიფუნქციურ კლინიკაში დაუყოვნებლივ გადაყვანის მოთხოვნით, შიმშილობა გამოაცხადეს. უკვე მე-12 დღეა ამავე მოთხოვნით, შიმშილობს ელენე ხოშტარია. ამ მომენტიდან, მეც ასევე, იგივე მოთხოვნით, ვაცხადებ შიმშილობას. რადგან არ გახლავართ პარლამენტის წევრი, ამის გამო, მათ პარლამენტის შენობაში ვერ შევუერთდები, ამიტომ (მშვიდობიანი და არაძალადობრივი პროტესტის) ამ პროცესს ენმ ცენტრალურ ოფისში განვახორციელებ", — დაწერა ბარამიძემ Facebook გვერდზე.

შიმშილობის დაწყების შესახებ პოლიტიკოსებმა დღეს, 14 ნოემბერს, პარლამენტის შენობაში განაცხადეს. შიმშილობას იწყებენ აკაკი მინაშვილი, თემურ ჯანაშია, ბაჩუკი ქარდავა, ნიკა მაჭუტაძე, გიორგი გოდაბრელიძე, სულხან სიბაშვილი, ლევან ბეჟაშვილი, აბდულა ისმაილოვი და დავით კირკიტაძე.

საკანონმდებლო შენობაში მე-12 დღეა ელენე ხოშტარიაც შიმშილობს. მისი მოთხოვნაც მიხეილ სააკაშვილის მრავალპროფილურ კლინიკაში გადაყვანაა.