დეკანოზ გიორგი მამალაძეს კორონავირუსი დაუდასტურდა. პენიტენციური სამსახურის განცხადებით, მისი მდგომარეობა შემდგომი დაკვირვების მიზნით ის გლდანის #18 დაწესებულებიდან სამოქალაქო სექტორის კლინიკაში გადაიყვანეს. ეს სწორედ ის დაწესებულებაა, სადაც ექსპრეზიდენტი მიხეილ სააკაშვილი იმყოფება.

უწყების განცხადებაში დეკანოზის ინიციალები წერია და აღნიშნულია, რომ ეს ინფორმაცია მაღალი საზოგადოებრივი ინტერესიდან გამომდინარე საჯაროვდება. ამავდროულად ისინი წერენ, რომ მსჯავრდებული კლინიკა ვივამედში გადაიყვანეს, იგივე ინფორმაცია გაავრცელა რამდენიმე საათის წინ დეკანოზის ძმამ, თორნიკე მამალაძემაც.

"საზოგადოების და მედიის მაღალი ინტერესის გათვალისწინებით განვმარტავთ, რომ მსჯავრდებული გ.მ. მე-18 (სამკურნალო) დაწესებულებიდან კლინიკა ვივამედშია გადაყვანილი. მას მიმდინარე წლის 13 ნოემბერს Covid-19-ის დამახასიათებელი სიმპტომები გამოუვლინდა (რესპირატორული სიმპტომები, ტემპერატურის უმნიშვნელო მატება). მსჯავრდებულს ჩივილებიდან გამომდინარე ჩაუტარდა PCR ტესტირება და მას კოვიდ-19 დაუდასტურდა", — ვკითხულობთ განცხადებაში.

On.ge თორნიკე მამალაძეს დაუკავშირდა, რომელმაც განაცხადა, რომ ინფორმაცია თავადაც ახლახან მიიღო. მისი თქმით, დეკანოზი იზოლირებულ საკანშია და შეხება მხოლოდ ციხის ადმინისტრაციის თანამშრომლებთან აქვს, რაც იმას ნიშნავს, რომ ვირუსი მათგან გადაედო.

"ის არის იზოლირებული, სამარტოო საკანში, მასთან შემხებლობაში არის მხოლოდ და მხოლოდ ადმინისტრაცია. თუკი მას გადაედო თანამშრომლისგან, ეს არის საგანგაშო, რადგან ადამიანებს ამ დაწესებულებაში უნდა მკურნალობდნენ და გამოჯანმრთელების სტადიაში უნდა იყვნენ, მიუხედავად ამისა ვხედავთ, რომ ადამიანებს სხვადასხვა დაავადება და ვირუსი ემართებათ. არცერთი ადამიანი იმ დაწესებულებაში არ არის არაფრისგან დაცული", — განაცხადა მან.

მამალაძე აცხადებს, რომ #18 დაწესებულება პატიმრების სასაკლაოა და 3 წლის განმავლობაში დეკანოზს არანაირი მკურნალობა არ ჩატარებია, რადგან საავადმყოფოს რესურსი არ გააჩნია.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა. 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.