ამერიკის შეერთებული შტატების სახელმწიფო დეპარტამენტის ყოფილი მაღალჩინოსნის, დევიდ კრამერის განცხადებით, პრემირმინისტრ ირაკლი ღარიბაშვილს და ქართული ოცნების დამფუძნებელ ბიძინა ივანიშვილს დასავლეთმა სანქციები უნდა დაუწესოს. The Bulwark-ზე გამოქვეყნებულ სტატიაში ის, ასევე, წერს, რომ ხელისუფლების აშკარა სიხარული ქვეყნის ყოფილი პრეზიდენტის მიმართ ძალადობაზე დასავლეთის მხრიდან უფრო სერიოზულ პასუხს იმსახურებს.

"გუშინ საქართველოს მთავრობამ გაავრცელა ვიდეო, სადაც ასახული იყო ხელისუფლების არაადამიანური, ღირსების შემლახავი და სასტიკი მოპყრობა პატიმრობაში მყოფი საქართველოს ყოფილი პრეზიდენტის მიმართ. ნება მომეცით გავიმეორო: საქართველოს მთავრობამ გამოაქვეყნა მტკიცებულება, რომ მან ამ ქვეყნის მესამე პრეზიდენტის უფლებები დაარღვია.

როგორც სასტიკ მოპყრობაზე, ასევე, აბსურდულ პიარ კამპანიაზე პასუხისმგებელი პირები დაუყოვნებლივ უნდა გადადგნენ. მაგრამ მიიღებენ ისინი ამ გადაწყვეტილებას თუ არა, მათ დასავლეთმა სანქციები უნდა დაუწესოს. სანქციების სიის სათავეში მოქმედი პრემიერმინისტრი ირაკლი ღარიბიშვილი და მისი მფარველი მილიარდერი ბიძინა ივანიშვილი უნდა იყოს. ეს უკანასკნელი ანადგურებს ქართულ დემოკრატიას სახელმწიფოს მიტაცებით, სასამართლო სისტემის კორუფციით და მოსკოვისკენ გადახრით", — წერს კრამერი სტატიაში.

გუშინ, 11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწარაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. უწყება აქამდე ამტკიცებდა, რომ სააკაშვილმა რუსთავის დაწესებულება თავისი ნებით დატოვა.

პენიტენციური სამსახური ამ ვიდეოს გამოქვეყნებასაც მაღალი საზოგადოებრივი ინტერესით ხსნის. უწყების განცხადებით, "კადრებში ნათლად ჩანს, როგორ არ ემორჩილება [სააკაშვილი] დაწესებულების თანამშრომლების კანონიერ მითითებებს, იქცევა აგრესიულად და მათ სიტყვიერ შეურაცხყოფას აყენებს".

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.

ასევე, გუშინ მიხეილ სააკაშვილის წერილი გავრცელდა, სადაც ის წერს, რომ როგორც კი სათანადო დაწესებულებაში გადაიყვანენ, შიმშილობას შეწყვეტს. ის 42-ე დღეა შიმშილობს.