"წინააღმდეგობა გასწია, შესაბამისად, იქ ძალაუნებურად, ძალის გამოყენება გახდა აუცილებელი", — ასე ეხმაურება ქართული ოცნების დეპუტატი, მიხეილ სარჯველაძე პენიტენციური სამსახურის გავრცელებულ კადრებს, სადაც ჩანს, რომ ექსპრეზიდენტი გლდანის ციხეში იძულებით შეიყვანეს. სარჯველაძე ძალის გამოყენებას ლეგიტიმურად მიიჩნევს, თუკი პატიმარი გადაწყვეტილების აღსრულებას უშლის ხელს.

"ფაქტია, რომ როდესაც პენიტენციურ სამსახურს პატიმარი ეწინააღმდეგება კონკრეტული გადაწყვეტილების აღსრულებაში, რასაკვირველია, ლეგიტიმურია, რომ შესაბამისი ძალის გამოყენებით, ოღონდ ეს უნდა იყოს პროპორციული ძალა და ა.შ. აღსრულდეს ის გადაწყვეტილება, რომლის შესრულებაც არის ყველასთვის სავალდებულო", — ამბობს ის.

პენიტენციურმა სამსახურმა გამოაქვეყნა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

მისდამი ასეთ მოპყრობაზე სააკაშვილმა იმ დღესვე ისაუბრა, როცა გლდანის ციხეში გადაიყვანეს. ის აცხადებდა, რომ წინააღმდეგობის მიუხედავად, იძულებით შეიყვანეს მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია. მისი ადვოკატი, ნიკა გვარამია კი ამბობდა, რომ პატიმრები, ე.წ. შუმოკით ფანჯრებთან სპეციალურად დაახვედრეს და სააკაშვილი აგინებინეს.

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.