სტრატეგია აღმაშენებლის ლიდერი, გიორგი ვაშაძე ამბობს, რომ თუ ნაციონალური მოძრაობა პირობას დაარღვევს და საპროტესტო აქციას იმ კლინიკასთან გამართავს, სადაც ექსპრეზიდენტი, მიხეილ სააკაშვილი იქნება გადაყვანილი, აქციას თავად დაშლის.

"დაარღვევენ? მე მივალ და მე დავშლი, მე ვეტყვი იქ აქციაზე მონაწილეებს, რომ წაეთრიეთ აქედან–თქო", — თქვა ვაშაძემ პალიტრანიუსის ეთერში.

კითხვაზე, იქნება თუ არა ის გარანტორი იმისა, რომ ენმ საკუთარ სიტყვას შეასრულებს, ვაშაძე ამბობს, რომ ის თავის წილ პასუხისმგებლობას აიღებს.

"თუ საჭირო გახდა, თუ კაცი კვდება, კაცო ყველამ უნდა ავიღოთ ჩვენი წილი პასუხისმგებლობა. მზად ვარ, კი ბატონო, არ არის პრობლემა არ გამიჭირდება, რომ მივიდე და მე ძალიან ვუფრთხილდები ჩემს მიცემულ პირობას და მზად ვარ, რომ მეც ავიღო ეს პასუხისმგებლობა", — აცხადებს ის.

განცხადება იმის შესახებ, რომ აქცია იმ კლინიკასთან არ გაიმართება, სადაც მიხეილ სააკაშვილი იქნება მოთავსებული, პარტიამ დღეს 10 ნოემბერს გააკეთა. მათი თქმით, ისინი ამაზე პასუხისმგებლობას სრულად იღებენ.

.

8 ნოემბერს ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

ნინო ლომჯარიას განცხადებით კი, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

სააკაშვილი ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში", რის შემდეგაც მასზე ფიზიკურად იძალადეს.

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.