ქართული ოცნების ლიდერების მხრიდან სახალხო დამცველის აპარატის არაერთხელ გამოთქმულ კრიტიკაზე აშშ-ის ელჩი კელი დეგნანი აცხადებს, რომ ამ ინსტიტუტის წარმომადგენლები კრიტიკას ნაცვლად ქებას იმსახურებენ. დეგნანმა, ასევე, აღნიშნა, რომ სხვა არასამთავრობო და სამოქალაქო ორგანიზაციებთან ერთად, სახალხო დამცველის აპარატი ქვეყნის განვითარებაში მნიშვნელოვან როლს თამაშობს.

"ისინი უფლებების დამცველები არიან და აქვთ ძალიან ბევრი ზედამხედველობითი ფუნქცია, რასაც ასრულებენ. მიმაჩნია, რომ სახალხო დამცველის ინსტიტური არის ერთ-ერთი ყველაზე უფრო მნიშვნელოვანი ინსტიტუტი ნებისმიერ ქვეყანაში და საქართველოში ის დაკომპლექტებულია პროფესიონალი და თავის საქმეზე შეყვარებული ადამიანებით. ვფიქრობ, კრიტიკის ნაცვლად, ქებას იმსახურებენ", — განაცხადა დეგნანმა.

ქვეყანაში მიმდინარე მოვლენების ფონზე ომბუდსმენის მხრიდან კრიტიკული განცხადებების შემდეგ მმართველი პარტიის წარმომადგენლებმა ნინო ლომჯარიას ნაციონალური მოძრაობის ინტერესების გამტარებელი არაერთხელ უწოდეს. ქართული ოცნების თავმჯდომარემ, ირაკლი კობახიძემ ლომჯარიას ენმ-ს ერთ-ერთი რიგითი აქტივისტიც უწოდა.